Pimmusay itoy nga aldaw, Abril 23, oras iti Filipinas, ti maysa kadagiti duri ti Literatura Ilokana, ni Apo Cristino I. Inay, Sr. iti tawenna a 77, kalpasan ti tallo a lawas a panagyanna iti ospital gapu iti panagsagabana iti cardiac arrest.

Agnaed ni Apo Inay agingga iti ipupusayna iti New Jersey, U.S.A., kaduana ti kaingungotna, ni Betty, iti sidong ti maysa kadagiti annakda, ni Maria Mirasol, a maysa a nurse iti nasao nga estado.

Sakbay a nagpa-Amerika ni Apo Inay, nagpapaay a Hepe ti Student Records Management & Management Education Section ti College of Social Sciences and Philosophy ti UP Diliman.

Malaglagipto ni Apo Inay a kas pundador ken umuna a presidente ti Sta. Cruz Writers Guild iti ilina a Sinait, Ilocos Sur, umuna a gunglo dagiti mannurat iti bario,  nga idi agangay, nagbalin daytoy a GUMIL Sinait (Gunglo Dagiti Mannurat nga Ilokano iti Sinait). Agsursurat idin ni Apo Inay iti Bannawag.

Nayasawa ken ni dati a Beatriz Tapat Ribuca, maysa a mannursuro a tubo ti Suksukit, Sto. Domingo, Ilocos Sur, naparaburanda iti uppat nga annak, da Cristino Jr., Cecilio II, Mary Jane, ken Maria Mirasol.

Sakbay a nagpaay ni Apo Inay iti UP Diliman, nangisursuro iti Quezon Memorial Colleges bayat ti panagsursuratna iti Bannawag, ken panagpapaayna a kolumnista iti nadumaduma a pagiwarnak iti Amianan a Luzon. (Lorenzo G. Tabin)