Salaysay ni PRODIE GAR. PADIOS
KASLA idi kalman laeng, ngem maikapaten a tawen ti ipupusay ti patgen nga ama, abogado, ken mannurat iti daytoy nga Abril 26 – daydi Dios-ti-aluadna nga Atty. Nole V. Lansangan wenno “Manong Nole” kadagiti adienna a mannurat.
Agpapan kadagitoy, malaglagip dagiti nagapuananna, saan laeng nga iti Literatura Ilokana no di pay ketdi kadagiti natultulonganna babaen ti pagadalan (St. Bede Learning Center) a pinundarda iti kaingungotna, ni Corazon Lansangan.
Tubo ti Victoria, Tarlac, ni Atty. Lansangan ti maikalima nga annak dagidi Dios-ti-aluadna a Cayetano ken dati a Constancia Valenzuela, agpada a mannursuro.
Idi arinunos ti 1940s, nagdappat ti kaamaan ni Apo Cayetano iti Salinungan West, San Mateo, Isabela ket ditoy ti nagubingan, dimmakkelan ken nakamulian ti kinatao ni Atty. Lansangan.
TURISMO: Intayon Idiay Ayuyang Garden iti Pila, Siudad ti Laoag!
Nagturpos iti abogasia ni Atty. Lansangan iti Manuel L. Quezon University (MLQU), Manila a kas self-supporting student.
Iti ayatna a manggun-od iti arapaapna nga agbalin nga abogado, iti bassit a tulong ken suporta ti dakkelna a lalaki, inkarigatanna nga inringpas ti kursona babaen ti panaglakona iti karioka, iti botelia ken diario, ken nagdianitor.
Kinamaestro ti kayat idi dagiti dadakkelna nga alaenna, ngem panagiwarnak ti arapaapna. Nagsusikda nga agama iti panangilabanna iti arapaapna, nupay kasta, nagtinnag nga abogasia ti rinugianna. Pimmanaw iti San Mateo tapno gun-odenna ti arapaapna iti Manila.
“Adu a rigat ti sinaparak,” malagip a kinunana idi sibibiag pay. “Ngem nagan-anusak ken inibturak dagidi a pannubok. Ti kapanunotak: no adda anus, adda magun-od. Nasamsam-it ti balligi a nasinginan kadagiti adu a pannubok, anus ken panagbuteng iti Dios.”
Inkallaysa ni Atty. Lansangan ni Prescilla (ti umuna a kaingungotna) idi makaturposda a dua iti abogasia iti MLQU. Idi mairuarna ti Bar, simrek a nagtrabaho iti gobierno idinto a nagtalinaed a kas ina ti pagtaengan ni Prescilla ken tinulonganna a nangpadakkel ken nangpatanor kadagiti annakda agingga iti nasapa nga ipupusay daytoy.
Nagtrabaho ni Atty. Lansangan iti Department of Trade and Industry (DTI) Main Office agingga a nagbalin a Division Chief ti Bureau of Foreign Trade.
Iti kaaddana iti DTI, impatulod ti gobierno kadagiti training iti nadumaduma a pagilian iti lubong. Nakatulong dagiti naaldalna para iti pannakapadur-as, saan laeng nga iti bukodna a departamento no di pay ket iti sibubukel a Departamento ti Trade ken Industry. Iti daytoy a trabahona, nalaka la koma a nagpabaknang ngem pinilina ti napudno ken nadalus a panangidaulo.
“Nabaknangak koma itan,” kinunana idi sibibiag pay. “Ngem diak mairusok a pakanek ti pamiliak iti madi a pamuspusan. Nagadalak iti kinaabogado, saan a tapno agpabaknang babaen ti kunniber ken no ania pay a kinadakes, no di ketdi tumulong kadagiti tattao, aglalo kadagiti marigrigat.”
Inkakaubingan ni Atty. Lansangan ti kinamannakitulongna. Idi adda pay iti unibersidad, adu a kaklaseanna ti tinulonganna babaen ti panangisurona kadakuada nga agsurat iti salaysay ken term papers. Natulonganna met ti bagina a kas self-supporting student babaen itoy a pamuspusan ta no kuan, adda met ipapetpet dagiti tultulonganna a padana nga estudiante.
Kas mannurat, adda pay laeng iti kolehio idi rinugianna ti nagsursurat iti Free Press ken Bannawag. Nagkolumnista met iti Bannawag babaen iti “Dear Atorni.” Nagpresidente pay iti GUMIL Metro Manila.
Arapaapna ti makapatanor ken makatakuat kadagiti ubbing a mannurat nga Ilokano wenno iti Iluko, ket rinugianna nga impablaak ti Salinong, (Salinungan Dagiti Mannurat) idi tartaraudi ti 1990s a nagipablaakanna kadagiti mini-sarita, mini-salaysay, mini-daniw ken sursurat dagiti mannurat ken jokes ken pagsasao.
Idi pakpakauna ti tawen 2000, inrusatna ti Constancia V. Lansangan Literary Awards (COVLLA). Adu a mannurat ti nagab-abak iti pasalipna kadagiti mini-sarita, mini-salaysay ken mini-nobela. Kasta met nga inrusatna ti "Mannurat ti Tawen" babaen ti COVLLA.
Ti papelna a kas pundador ti pagadalan (St. Bede) ti ibilangna a legacy-na. Mairaman pay ditan ti COVLLA ken Salinong.
“Daytoy ti ibilangko a nanumo a kontribusionko iti Literatura Ilokana,” malagip a masansan a kunkunana idi.
Saan a nailinged dagita a kontribusionna para kadagiti mannurat ken iti Literatura Ilokana iti GUMIL Filipinas, gunglo dagiti mannurat nga Ilokano, ket impaayanda iti “Tan-ok (Gumilianos/Gumilianas) Award" iti pannakaselebrar ti maika-50 nga anibersario ti gunglo a naangay idiay Moonlite Paradise Resort, Diora-Sinungan, Sta. Ana, Cagayan idi Abril 20-22, 2018.
Iti Villa Cruz, aglalo iti panawen ti Paskua, ibilang dagiti ubbing a “Santa Claus.” Aglilinia dagiti ubbing a mapan agmano kenkuana, ket yawatanna met ida iti dulse ken dadduma pay a makmakan, agraman dagiti kasapulan dagiti ubbing iti eskuelada.
Kas ama, nagballigi a nangpatanor ken nangpabasa kadagiti annakna. Bin-ig a propesionalda ken addan bukodda a pamilia, malaksid iti buridekna iti umuna a kaingungotna a biktima ti polio idi ubing pay.
Pimmusay daydi Atty. Lansangan idi Abril 26, 2018 gapu iti Intestinal Stroke ken Septic Shock iti tawenna a 78.
Agnanaedda idi iti maikadua a kaingungotna a ni Corazon iti pagtaenganda iti Villa Cruz, San Mateo, Isabela a pangimatmatonanda iti maikadua a sanga ti St. Bede Learning Center a pre-school-da (adda iti Manila ti umuna a sanga ti pagadalan).
Naimassayag iti St. Peter De Apostle Memorial Homes, City Road Dubinan East, Santiago City. Naipumpon idiay Santiago City, Isabela iti Mayo 1.
Inulilana dagiti annakna iti daydi Dios-ti-aluadna a Prescilla, ti umuna a kaingungotna ken kaklaseanna idi iti abogasia, a da: Nanette (Dodong), Nocilla (Ronald), Nirvana (Prodie), Numencia, Natasha (Arnold), Noel (pimmusayen) ken Novio; ken dagiti annakda ken ni Corazon, ti maikadua a kaingungotna, da: Sonnet (Isah), Nimcy (Joerey) at Nacre Vida (Bryanne); ken dagiti appokona a da Celdon, Bianca, Jonathan, Odie, Joshua, Jasrinne, Janelle, Giana, Nolan, Nico, Marcone, Jcy, Vyanne, Nason ken Vyenize. --O
