Uppat a Daniw ni HONOR BLANCO CABIE
a yate para kadagiti turista nga agpaspasiar iti Siudad ti Paris. Makita ti Statue of Liberty iti bassit a puro nga aw-awagan Île des Cygnes, asideg ti Rangtay Pont de Grenelle, di adayo iti Eiffel Tower.
1
estatua ti wayawaya* adda't
baba ti puseg seine a karayan,**
5 a Daniw
dadduma ta matptapliakan yan
no 'tay adda tudtudo ken kimat.
kas man isu daytay mangbambantay
kadagiti turista nga adda
'ti yate a lumabas kas ita,
tattao a napnuan ‘ti murmuray.
ay! ngem nasingpet met ti ayus ti
danum no panawen kalgaw, awan
mangngeg, mangbekkel nga ung-ungorna
kadagiti aldaw ken rabii.
panagtakderna 'diay estatua't yan
ta mangriing 'toy muging ken rikna.
*asideg iti pont de grenelle a rangtay
iti ile aux cygnes,iti karayan seine,
777 a kilomnetro ti kaatiddogna a
lumabas iti paris, agtayag 11.50 a metro.
karayan seine, paris.
2
anian kinaturedmo a bato
awan man la inka a nayarpaw
iti baba dayta pus-ong, aliaw
kenka awan -- batoka a pudno.*
adda tangtangkenna dayta, ngata
kunam, ay! ngem anian kabassit ti
ipakpakitam a pagkakari,
awan inna bangonen a rikna.
pati dayta adda 'ti abaymo
sirsirigek awan man la daytay
panagbain -- 'ti ili nga innak
dinakkelan dayta di maitudo.
adda linglingdak a mangmurmuray
patawid ni adan ubbog ragsak.
*adda dagitoy a bato iti trocadéro,
nagan ti torre iti chaillot, nagan ti
palasio a naipasdek idi 1878 a narebba
idi 1937 tapno ipatakderda ti palais de
chaillot, kasumbangir ti eiffel tower.
trocadero, paris, abay ti karayan seine.
3
dumaw-as met daytoy numok iti
museo* yan ni mona lisa ngem
anian paidamna ta nagpakni.
pagesmak 'diay panangtan-awna 'ti
sangsangpet mangidaton 'tay raem,
harana manglailo't rabii.
adtoyak arubayanna iti
di adayo't torre ti eiffel** ngem
awan panglakagan daytoy bagi.
rummuarka kad' o mona lisa 'ti
museo nga indegmo't agmalem
ken agpatnag: denggem daytoy kari.
denggem daytoy barukong nga agdir-i,
'toy muging a napnuan panagraem,
daytoy anak sabali a puli.
*300 a metro, masarakan iti champ de
mars, mangtantan-aw iti karayan seine
** maysa a mohon ti
pransia, agtayag iti 300 a metro masarakan
'diay champ de mars, paris.
musee du louvre, paris.
4
pul-oy ung-ungnguenna 'toy kudilko:
adda yar-arasaasna kaniak,
adda irut tengngelna't mugingko
pakaigapuan panagaruyot luak.
'madamdaman, adan, agawidkan' –
dayta ti asug 'toy pul-oy kaniak,
'ditoyka pay koma toulouse a yan,
yan agsisilpo, oui,* a ragragsak.'
ay! ngem masapul nga agawidak
iti lugar innak dinakkelan,
lugar yan kabkabrong ken tamtambak,
'ti nakairuamak a kakellengan.
manen, pul-oy ta apungolennak --
adda agar-aruyot met 'ti karkarmak.
*wen, iti pagsasao ni ilokano.
'
le capoul, toulose, france.
