Impaganetget ni kandidato a senador ken dati a Sekretario ti Department of Public Works and Highways (DPWH) Mark A. Villar ti  kinapateg ti Sorsogon Coastal Road a naluktan idi Agosto 2020.

“Maysa kadagiti ipagpampannakkelko a proyektok ti Sorsogon Coastal Road. Babaen daytoy, nalaklaka itan para kadagiti tattao ti makagteng kadagiti namsek iti pakasaritaan ken buya iti Barcelona ken Bulusan. Papigsaenna pay ti lokal nga industria ti turismo,” kinuna ni Villar.

Daliasaten ti Coastal Road ti Rompeolas wenno ti baywalk ti Sorsogon agingga iti Barangay Balogo, isu a maikkan met iti gundaway dagiti biahero a makaimatang iti napintas nga igid ti baybay ti Sorsogon. Kangrunaan ketdi a pakaaramatan ti Coastal Road ti panagserbi daytoy a kas  Diversion Road dagiti lugan ken tapno mapasayaat ti biahe iti nagbabaetan ti Casiguran, Gubat, ken Castilla.
“Mabalin a maibilang ti uppat a linia a Sorsogon City Coastal Road nga addaan iti kaatiddog a 5.52 a kilometro a kas maysa kadagiti kadadakkelan a proyekto iti babaen ti “Build, Build, Build” iti Bicol Region nga inwayat ti DPWH Regional Office 5 ken ti Sorsogon First District Engineering Office,” innayon ni Villar.

Mangrugi ti Coastal Road nga addaan iti rock causeway ken tallo a rangtay nga addaan iti pakabuklan a kaatiddog a 110 a metro  iti junction ti Daang Maharlika ken lasatenna ti sumagmanano a barangay ti Sirangan, Sampaloc, Balogo ken iti di agbayag, maikonektarto kadagiti barangay ti Pangpang, Tugos, Cambulaga, ken Talisay iti Sorsogon City.

Addaan pay daytoy a proyekto kadagiti naisangrat a pagnaan dagiti bisikleta a mangrugi iti Daang Maharlika ken agpatingga iti transport terminal iti Sorsogon City.

“Ipagpapatuloy po natin ang mga ganitong proyekto; hindi lang naman para sa atin ‘to. Para sa mga anak at apo din natin at sa susunod na henerasyon,” kinuna ni Villar.

Malaksid iti panangpalukayna iti nairut a trapiko kadagiti kangrunaan a kalsada iti Sorsogon City, naaramid pay ti kalsada a kas salaknib kadagiti madalananna a lugar kontra iti panagdakkel ti danum ti taaw nangruna ket ti Bicol Region ti maysa kadagiti kangrunaan a dalanan dagiti bagyo a sumsumrek iti sakup ti Filipinas.