Napagtalinaed ni Sandro Marcos ti bentahena iti surbey iti kinadiputado, a pinaboran ti kaaduan a respondent iti surbey nga RP-Mission and Development Foundation (RPMD). Maibasar iti kaudian a surbey, ni Ferdinand Alexander “Sandro” Marcos, anak ni sigud a Senador Bongbong Marcos ken kandidato iti kinadiputado iti Primera Distrito iti Ilocos Norte, ti umun-una iti salisal nga addaan iti 65% voter preference.
Adda bentahe ni Sandro Marcos a tallopulo ket tallo a porsiento iti maikadua a ni Ria Fariñas a nakaala iti 32% voter preference. Tallo porsiento ti nagtalinaed nga undecided.
Ni Ria Christina Fariñas ti agdama a pannakabagi ti nasao a distrito iti Ilocos Norte. Daytoy met ti umuna a gundaway nga agpaidasig ni Sandro Marcos.
Naiwayat ti surbey a nawaya ken awan ti nangkomision manipud iti Abril 28 agingga iti Mayo 2, 2022 kadagiti 1,000 a rehistrado a botante. Addaan daytoy iti margin of error a 3% (+/-) ken nagusar iti random sampling.
