Ni SAMANTHA D. PAGULAYAN
Kumakanta, aktres, host, prodiuser. Isu dayta ni Toni Gonzaga. Asino ngata pay ti di makaam-ammo kenkuana iti mapanen a 20 a tawen a kaaddana iti industria ti entertainment? Ngem kadagiti napalpalabas a bulan, kasla naiturong manen kenkuana ti imatang dagiti tattao ngem iti sabali a rason—ti pagtaktakderanna iti politika.
Nakakalkaldaang ta dagiti tattao a di kumanunong iti pamanunotanna iti politika, pinagsasawanda ken arigna binaddebaddekanda ti naganna. Nangrugi ti amin idi ininterbiuna ni dati a senador Ferdinand “Bongbong” Marcos, Jr. (BBM) iti online show-na a “Toni Talks” a ti kinapudnona, nagparangan metten dagiti dadduma pay a politiko manipud kadagiti nadumaduma a partido politikal.
Daytoy a “bashing” ken “cancelling” kontra kenkuana, nagtultuloy idi makitkitan dagiti tattao isuna kadagiti campaign rally ti UniTeam ni BBM nga agtaray a presidente a kaduana ni Sara Duterte iti kinabise presidente.
Ngem saan ketdi nga ipalpalubos ni Toni a lapunosen isuna ti kinanegatibo. Kunana man a naruamen a makan-cancel iti agduan a dekada a kaaddana iti showbiz. No addaka a kanayon iti imatang dagiti tattao, kinunana nga ammom la ketdin ti naggidiatan ti konstruktibo a kritisismo ken panangdadael.
TURISMO: Intayon Idiay Ayuyang Garden iti Pila, Siudad ti Laoag!
Imbes a makiriri wenno makisinnungbat, agtaltalinaed a kalmado ken natibker iti agtultuloy a panangitakderna kadagiti bukodna a prinsipio ken panirigan iti politika, a kas kunana, karbenganna met dagitoy.
“Ti naulimek a leon, amang a nabilbileg ngem ti tumanaul nga aso. Saanmon a pakabuongan ti ulom no ania ti panagkita dagiti sabsabali a tattao kenka,” kinunana.
Kinapudnona, nasursuron ni Toni a pagbalinen ti negatibo nga enerhia a kas ramit tapno ad-adda pay a maitantudona ti UniTeam babaen ti positibo a panagkampania. Kas koma bayat ti maysa a panagkampaniada idi iti Las Pinas, impaganetgetna a ti panagkaykaysa ken ti kultura ni Filipino (a saan ket a “cancel culture”) ti ad-adda a pampanunoten ti UniTeam ken dagiti supporters ti grupo.
Ti Manangidagel a “Cancel Culture”
Agpayso met a makapaleddaang, no di man makaidagel, ti panangar-aramat dagiti tattao iti “cancel card” wenno panangbasnotda kadagiti saan nga umayon iti paniriganda, a kas man kabukbukodanda ti kinasirib wenno ammo wenno ti panagayat iti pagilian.
Agbibiagtayo iti maysa a nawaya a gimong, ket no pudno met laeng nga adda pateg kadatayo ti demokrasia, masapul ngarud nga awaten wenno abrasaentayo a saan nga amin a tattao ket addaan iti panirigan a kas iti panirigantayo, ken rumbeng laeng koma nga ipaaytayo ti panagraem kadakuada a kas met iti panangnamnamatayo nga ipaayda ti panagraem kadatayo. Ti wayawaya a mangipeksa iti kapampanunotan ket saan a para laeng iti maysa a tao, partido wenno grupo no di ket maipaay daytoy a karbengan iti asino man.
Makainspirar ngarud ti kinatibker ni Toni. Iti maysa nga innuman, nakaipeksa iti maysa a nabileg a mensahe maipanggep iti “cancel culture” wenno pananglapped iti asino man a di umayon iti kayat. Kinunana, “Iti laksid ti kaadu man dagiti tattao wenno uray man ket mamin-ano a kanselarendaka, ti napateg ket isu ti dimo panangkanselar iti bagim. Mabalin a ti amin ket kontra kenka, ngem ti nasken, saanka a kontra iti bagim. Ta no mapasamak dayta, daytan ti kadakkelan a kita ti panangliput.”
Wen, karbengan laeng ni Toni nga ipeksa ti panirigan wenno kapampanunotanna. Karbenganna laeng nga itandudo ti pagtaktakderanna iti politika ken ti karbenganna a mangpili kadagiti sumarsaruno a lider ti pagilian.
Iti laksid dagiti amin nga agkakagubsang a balikas a mayab-ablat kenkuana, no namin-ano metten nga impaneknekna ti kinatibkerna. Saanna nga ikankano dagiti kritisismo nga agpanggep a mangpasardeng kenkuana iti ar-aramidenna agsipud ta am-ammona ti bagina, ammona no ania ti patienna, ken siaammo kadagiti pagrebbengan ken karbenganna a kas tao ken kas Filipino. --O
