Ti kandidato a senador ti UniTeam ken sigud a Sekretario ti Department of Public Works and Highways (DPWH) Mark A. Villar ti nakayalat iti maikadua a puesto iti surbey iti kinasenador iti umay nga eleksion inton Mayo 9 nga insayangkat ti OCTA Research babaen ti 55% a voter preference.
Nagyaman ni Villar iti resulta ti surbey ken impaganetgetna nga ad-adda nga igaedna tapno mangabak iti daytoy nga eleksion.
Segun iti naiwayat a surbey iti Abril 22-25, 2022 nga addaan iti 1,200 katao manipud kadagiti nadumaduma nga agpang ti kagimongan iti intero a pagilian, adda iti umuna a puesto ni Raffy Tulfo nga addaan iti 63% a voter preference.
Sumaruno ken ni Villar (55%) iti maikatlo ken maikapat a puesto da sigud a senador ken Diputado ti Antique Loren Legarda (51%) ken Sen. Juan Miguel “Migz” Zubiri (49%).
TURISMO: Intayon Idiay Ayuyang Garden iti Pila, Siudad ti Laoag!
Maikalima ken maikanem a puesto met da Gobernador ti Sorsogon Francis “Chiz” Escudero (46%), aktor Robin Padilla (44%), ken sigud a House Speaker Alan Cayetano (40%).
Kabayatanna, adda iti maika-7 agingga iti maika-12 da Senador Win Gatchalian (39%), Senador Joel Villanueva (36%), sigud a Senador Jinggoy Estrada (33%), sigud a Senador JV Estrada Ejercito (31%) ken Senador Risa Hontiveros (31%).
Sumarsaruno met da sigud a Bise Presidente Jejomar "Jojo" Binay (31%), sigud a Mayor ti Quezon City Herbert Bautista (27%), sigud a Presidential Spokesperson Sec. Harry Roque (24%), sigud a Philippine National Police (PNP) Chief Guillermo Eleazar (22%), sigud a Senador Gringgo Honasan (22%), ken sigud a Sekretario ti National Defense Gilbert “Gibo” Teodoro (20%).
Kuna ni Villar a no bilang mangabak daytoy a senador, maitultuloy ti Build Build Build Program tapno makaipaay iti pagbiagan dagiti mangmangged a Filipino.
Malaksid a nagpaay a sektetario ti gabinete ni Presidente Rodrigo Duterte, nagpaay ni Villar a diputado iti Las Piñas City.
