Maibasar iti resulta ti kaudian a surbey ti HKPH-Public Opinion and Research Center iti pannakitinnulong ti Asia Research Center a nakabase iti Hong Kong, umun-umuna latta ni kandidato a Senador ken sigud a Sekretario ti Department of Public Works and Highways (DPWH) Mark A. Villar iti surbey iti kinasenador iti umay nga eleksion itoy Mayo 2022 babaen ti 70.5% voter preference.
Kuna ni Villar a pakaidayawan ken inspirasionna ti suporta, panagtalek ken panangipateg dagiti umili iti panagserbina iti publiko. Innayonna pay a naragsak iti resulta ti surbey ken agyaman kadagiti umili a mangsupsuporta kenkuana ken agtalek iti kabaelanna nga agserbi iti pagilian.
Sumarsaruno ken ni Mark Villar ni Diputada ti Antique Loren Legarda (66.3%), broadcaster Raffy Tulfo (62.7%), Gobernador ti Sorsogon Francis “Chiz” Escudero (58.4%), Senador Juan Miguel “Migz” Zubiri (53.6%), ken aktor Robin Padilla (46.8%).
Adda met iti maika-7 agingga iti maika-12 da Sen. Win Gatchalian (46.2%), sigud a House Speaker Alan Cayetano (45.1%), sigud a Bise Presidente Jejomar "Jojo" Binay (43.7%), sigud a Senador JV Estrada Ejercito (41.5%), sigud a Senador Jinggoy Estrada (37.8%) ken sigud a Senador Gringo Honasan (34.1%).
TURISMO: Intayon Idiay Ayuyang Garden iti Pila, Siudad ti Laoag!
Nairaman pay iti listaan dagiti magusgustuan a kandidato a senador da Senador Risa Hontiveros (33.4%) a maika-13, a sarunuen da Sen. Joel Villanueva (31.6%), Senador Dick Gordon (28.1%), sigud a Mayor ti Quezon City Herbert Bautista (25.3%), sigud a Senador Antonio Trillanes IV (23.5%), sigud a Presidential Spokesperson Sec. Harry Roque (22.7%), sigud a Defense Secretary Gilbert Teodoro (21.2%), Senador Leila De Lima (17.5%), sigud a Philippine National Police (PNP) Chief Guillermo Eleazar (17.2%), Astravel “Astra” Pimentel-Naik (16.8%), Atty. Chel Diokno (14.6%) ken Atty. Lorenzo 'Larry' Gadon (13.5%).
Nagyaman ni Vilar iti HKPH-Public Opinion and Research Center ken impanamnamana nga itultuloyna ti napintas a narugian ti Build Build Build Program tapno makaipaay iti pagsapulan para kadagiti mangmangged a Filipino.
Naiwayat ti surbey iti Abril 24-28, 2022 babaen ti sangonsango nga interbiu kadagiti 5,500 katao, addaan iti 1% a sampling error margin para iti national percentage.
