Uppat a Daniw ni HONOR BLANCO CABIE
1
Daytoy panagmaymaysatayo mangparusing
namnama para iti pagiliantayo.*
Manipud Kadagiti Agdama a Kameng ti Bannawag: Dios ti Agngina!
--Ferdinand "Bongbong" Marcos Jr.
ladawan 'windmills' a kuna't ingles
adda kadagiti dakulapdan,
iparangarangna bigat addan,
awanen kameng a maidadanes.
da ilokano, bikolano, da
bisaya, hiligaynon, dagiti
dadduma pay a kameng ti puli
bumangondan manipud uldagda.
adda 'ti paligpalig 'tay pigsa,
mangted panagtitipkel ken bigat,
addada amin likudanna 'diay
mangipig: sarukod iti dana.
iti binnadangda dumteng rimat
pagilianda agsagrap 'tay rang-ay.
2
Laki sa nakaw, laki sa nakaw (dua a balikas
kas panayudan nagan ti ipaipusna imbes a
Jeproks a kansion ni Mike Hanopol).
--kankantaen ni Rowena Guanzon kadagiti
entablado iti rali politikal ni Robredo kas
parodia ti kansion.
panagbirakat ni rowena 'diay
sanguanan padana nga agpukpukkaw
sinerreken sairo, ay-ay pay,
awan 'ti dilana daytay aliaw.
'ti entablado ni rowena riaw
a riaw, 'duwag'* ipukkapukkawna,
ay! ngem lapayag di agamangaw --
kayatnan nga agdinnanoganda.
koma no kurang nagadalanna
ngem nasobraannan sa met ngarud,
awan mangngeg a sudi't dilana,
adda sugpetna nga ubbog rurod.
aglua ti langit a mangay-ay-ay:
panagpukpukkaw nakalidliday.
*"hinahamon kita ng debate, one on one,
pero ayaw mo kasi duwag ka."
3
Hail Leni/ full of grace/ my vote is with
you.
--nakaipalkat iti derosas a trapal nga
ig-iggaman uppat a nakaderosas a
babbai, kadua iti trapal ti retrato ti
umis-isem a kandidata para presidente.
adda siddaaw ni atanudko
iti panangaramatda iti
araraw a yes-esngaw ti puli
no 'tay mangmisan’ padre damaso.
ay! ket dimmakel pay siddaawna
idi awan tagasimbaan, 'tay
nangdillaw 'ti iwagwagayway, ay!
addan 'tay katarata ti mata.
ditoy metten daras napukawko
daytay panagtamed, panagraem
iti dadduma pannakabagi
ti dios 'ti lubongmi ken 'tanudko.
rumbeng ken’ damaso daytay tadem,
daytay pannakarungrungdot' bagi.
4
wagwagenyo da kingkong ken lenor,
saan a dung-aw 'diay mangmangngegan,
ketdi batibat kas 'tay pangkurkor
manok 'ti kakab no timmapuakdan.
kadua daydiay saibbekda daytay
batibat nga adda't sanguananda
'tay nagdalungdong ulo ni patay,
daytay kumpay iggem dakulapna.
torsienyo 'diay tangan ti sakada
tapno makariingda 'ti pinktas
parbangon nga inarapaapda --
irut pammati limmukay daras.
saanyo a panawan amangan
ta maduktalanda naiwalangdan.
