Daniw ni HONOR BLANCO CABIE
1
Tigre, pagpupuniponan kabaelan, ken agila,
Kuadro ti kinadayaw, karisma -- imbuniagda a naganyo
Iti panagaskaw panagampayagyo naames a kabakiran ken tanap
TURISMO: Intayon Idiay Ayuyang Garden iti Pila, Siudad ti Laoag!
Nagkakamakaman karit, bugkaw ken bultak;
Diyo inggingina't pananglasatyo't natapok a tapaw bantay
Karayan a naat-atianan nakaimurumoran nakaad-adu
Aggiginnabbo agkikinnawil bumanang-es a batbato
Makamermer narungsot a tapok nagrengngaten a tanap
Bakir ken bambantay nagburasanyo't arapaap
Para kada maladaga, ubbing, nataengan ti Filipinas.
2
Kadagiti linasatyo a dan-aw ken puyupoyan
Agraman lawa matantan-awan manipud baetan
Saanyo a sinamir allumigas, bunar, ammimisay, sabawil
Impukpukkawyo latta napasnek a panggepyo
Makita kakailian manipud Batanes, Sierra Madre
Agpababa't Cordillera, Caraballo pagsumbangiranna
Iti abagatanna, Metro Manila, Bikol, Kabisayaan, Mindanao
Pagal-allangogangan Daghang Salamat, Assalamu Alaikum
Maymaysa ti idirdir-i nabatad nalawag a mensahe:
Panagmaymaysa tattao ti Filipinas, Daga a Pinili.
3
Agkakamakam nga insulto, panangiwagwagayway
Kinaalas kano ti tawidyo nanglillili kadakayo a panawen
Awan aldaw, rabii a dikay nabultak, nauy-uyaw, nairurumen
Naipangpangta ngem diyo pulos ida inkankano, intuloyyot' nagna
Iti essemyo a magun-od panagmaymaysa itatakder ti pagilian
Bugas ken bagas innaldaw napasnek a mensaheyo
Impalpalladawyo kadagiti namati a taripnong
Kadagiti entablado iti ungtot' nawatiwat a parada
Nangsaraboan rinibu a nangitantandudo kadakayo
Nangted asugi kadagiti mapakpaksuyan a panunot ken bagi.
4
Rugianyon pagangsen makabang-ar nga arapaap umili
Tapno daytoy 7,107 a puro ti Filipinas, Perlas iti Daya,
Bumangon manipud pagul-uldaganna a taptapliakan
Taaw Pasipiko, Philippine Rise, yan Apolaki Caldera,
Babuyan ken Balintang Channel, Taaw Celebes ken Sulu;
Lukibenyon pagannurotan pagalagadan sumuno a tawen:
Panangitag-ay kada mannalon, mangngalap, mangmangged paktoria,
Negosiante, agkalkali't kamangeg iti siudad, agop-opisina, drayber,
Itungpalyo ti pannakapaadu dagiti kalsada, rangtay,
Riles ti tren, pagpaagasan, pagimbagan ken dadduma pay.
5
Umadanin ti nepnep, denggenyot' ungor nabaringkuas a karayan,
Apras dagiti kabakiran amianan ken abagatan mangin-indayon
Kadagiti nadumaduma a nagpayak kas pittagaw, denggenyo
Ti saning-i dagiti awanan patapaya sallabawan ken pagtaengan,
Dagiti imudmudumod iridridis kumurabkurab a kinakurapay
Dagiti di makabayad nangato a presio ti kuryente, agas, nateng,
Danum, ikan, karne, gasolina, lana, bagas dadduma pay a gatangen
Dakayo a tigre ken agila pangnamnamaan ti pagilian
Addaankayo iti biag, bileg, panam-it kararua, sirmata ken parmata,
Adda't sin-aw mugingyo 'tay mangpasurot panagmaymaysa.
6
itan ta 'toy bigat ti naglawag
nangted bang-ar barukong da adu
awan amakmi nga itungpalyo
baneg kari itag-ayyo ti biag.
programa ti gobierno nga inkay
sinukatan im-imayo itan
ingatoyo't wasnay ti pagnaan
agbibinnadangtay iti rang-ay.
inton umasidegen ti sipnget
iti pagtakderan ingatotay
ti muging a dinaripespes ti
anian bulanosna a panaglin-et:
siak filipino addaan raay
rang-ay, panagmaymaysa ti puli.
