Mangnamnama ti Departamento ti Edukasion (DepEd) nga amin nga estudiante iti amin a tukad ken addada man kadagiti para publiko ken pribado a pagadalan, sumrekdanton iti eskuela tapno rupanrupanton ti panagsursuroda iti umay a panaglulukat dagiti klase (SY 2022-2023).

Kinuna ni Education Secretary Leonor Briones iti Laging Handa public briefing idi kalman (Mayo 30) nga addan 34,238 nga eskuela iti sapasap a pagilian a nairekomendar a mangangay no di man mangang-angayen iti face-to-face classes wenno 73.28 a porsiento iti pakabuklan dagiti eskuela iti pagilian.

Itoy a dagup, 33,064 ti eskuela ti turay idinto a 1,174 ti pribado.

Nupay kasta, kuna ni Briones nga agbatay pay laeng iti panagamiris ti LGU ken ti Departamento ti Salun-at no sumrek wenno saan dagiti estudiante. “Magkakaiba sa mga iba’t-ibang sitwasyon ng mga lugar at depende sa LGUs at assessment of DOH,” kinunana.

Malaksid iti daytoy, kuna ni Briones nga iti laksid ti face-to-face classes, nasken koma a maipatungpal latta dagiti pagannurotan iti salun-at.