Maangay ti tinawen nga Abrenian Heritage Film Festival (AHFF) inton Septiembre 9-10, 2022. Daytoy ti maikapat a tawen a  pannakaangay ti AHFF, nga itoy a tawen, addaan iti tema a "Tagipatgen" (Values).

Naangay ti immuna nga Abrenian Heritage Film Festival idi Septiembre 11, 2019 a kas pannakipaset ti probinsia ti Abra iti pannakarambak ti maika-100 a tawen ti Philippine Cinema iti panangidaulo ti Film Development Council of the Philippines (FDCP).

Iti daytoy nga AHFF 2022, kinuna ti festival director ken pundador ti Sine Abreño a ni Dexter Galban Macaraeg a maiparang dagiti tagipatgen ken tradision dagiti Ilokano ken Cordilleran tapno maitandudo a saan ket a malipatan dagiti sumarsaruno a henerasion.

Kas panglukat iti festival, kinuna ni Macaraeg a manamnama ti pannakipartisipar ti Abra Tinguian Ilokano Cultural Ensemble (ATICE) a pangipresentaranda iti salidummay ken uggayam ken panagsala iti tadek ken pallook.

Mainaig itoy, aw-awisen ni Macaraeg dagiti independent film makers a makipartisipar iti festival. Deadline ti panagidatag iti entry: Hunio 30, 2022. Para iti dadduma pay nga impormasion, kauman a mismo ni Macaraeg iti 09154072323 wenno bisitaen daytoy a link: https://forms.gle/N4gBsvN9Rb6tZyVx6 .