Daniw ni HONOR BLANCO CABIE
no kayatmo a biagmo addaan salibukag,
saanmo ngarud a ruamen ti panaguldag.
--manipud iti karta ni crispulo baylon iti
sagibsibna a lalaki nga ared-ed.
Manipud Kadagiti Agdama a Kameng ti Bannawag: Dios ti Agngina!
sakbay lawag 'ti daya daytay bumtak,
siak, ni andong nga agtaltalon, isardengkon
ar-arapaap, unaakon tartaraok ken kutkutak
tapno mabukodak napnuan kari a parbangon.
no arapaap saanko nga isardeng
amangan lumoten daytoy bukotko,
maawananak mayawid ditoy taeng,
aduntot' babbabawi ditoy panunotko.
sungrodak ngaruden 'toy dalikan,
ipapudotkon kinirog a bagas dengngep
rusok tapno siduksidok di malamiisan,
pamuskolen man manglimlimo nga angep.
a, ngem sakbay nga innak umaskaw,
mangurosak, ni apo dios saanko a tallikudan,
agyamanak iti paraburna ita nga aldaw
kasta met iti tulongna iti innak nagnagnaan.
no ti panagbiag makapasala a musika,
umuna a nota ti panagyaman iti dios
kas 'tay nagipus, natuldokan a sinkopata,
rugso dagiti nota saanda man a maibus.
sakbayak ita a bigat 'tay tumapog,
dadakkeldan neberde a sanengko a birhinia,
binigat a rinagragaderaak 'diay lapog,
iti kawatiwatan nasalemsem nga agsapa.
wen, birhinia, aduda kenka a manggurgura,
ta biagmi nga i-karayan kano inka putputden,
dika agalumiim addaak a mangiwalawal kenka
ta mangidatonka't napateg a regalo't agmalem.
awan met pay ngarud ti inda isukat
tapno annakko a pito innak maidur-as,
imulaka tapno mabalitokam daytoy gasat,
iti masanguanan, pategmo dinto agkupas.
