Inawat ni Remy N. Albano, Presidente ti GUMIL Filipinas ken agdama a Bise-Gobernador ti Apayao, dagiti kopia ti Tarabay iti Ortograpia iti Pagsasao nga Ilokano manipud ken ni Dr. Benjamin M. Mendillo, Fultaym a Komisioner a mangibagi iti Ilokano iti Komisyon sa Wikang Filipino (KWF), idi Hunio 23 iti opisina ti KWF iti San Miguel, Manila.

Segun ken ni Albano, reprint ti nasao a kopia ti Tarabay nga immuna nga impablaak ti KWF idi 2012.

“Kas met laeng iti immuna a Tarabay, tumulong ti GUMIL Filipinas a mangiwaras iti libro kadagiti mangisursuro iti Mother Tongue ken mangyadal iti umisu a pannakaisurat dagiti balikas nga Ilokano, kas iti kidkiddawen nga standard ti KWF,” kuna ni Albano.

Innayonna a manipud naipablaak idi 2012, ti Tarabay ti inusar dagiti mannursuro iti Rehion 1 ken 2 a reperensia ti Department of Education iti pannakaisurat dagiti Learning Materials iti Ilokano para iti Mother Tongue Based Multilingual Education (MTB-MLE).

Impeksa met ni Komisioner Mendillo ti panagyamanna iti GUMIL iti kinaalibtak daytoy a mangisayangkat kadagiti proyekto tapno mapadur-as ti pagsasao ken literatura dagiti Ilokano.

Ti istandardisasion iti ortograpia iti pagsasao nga Ilokano ti maysa kadagiti programa a pagtinnulongan nga isayangkat ti GUMIL ken KWF, kas sagudayen ti Memorandum ng Kasunduan a pinirmaan da Albano ken KWF Chairman Arthur P. Casanova iti Manila idi Nobiembre 26, 2021.

Sakbay ti pormal a pannakayawat dagiti kopia ti Tarabay, nataming dagiti dadduma pay a proyekto ti GUMIL ken KWF para iti panakapadur-as ti pagasasao nga Ilokano babaen ti maysa a miting da Mendillo, Albano ken Neyo E. Valdez, Sekretario-Heneral ti GUMIL Filipinas.

Kadagiti interesado a maaddaan ti kopia, mabalin ti ag-email iti GUMIL Filipinas iti [email protected] wenno ken ni Apo Valdez iti [email protected].