Ni EDISON B. TOBIAS
Naipaay ken ni Esperanza “Lola Ansing” Pascua Javier-Belen ti Brgy. Luga, Santa Teresita, Cagayan, ti Centenarian Award itay Hulio 5, 2022 gapu iti pannakagteng daytoy iti edad a sangagasut (100) idi Oktubre 18, 2021.
Kas sagudayen ti linteg a Republic Act 10868 wenno Centenarian Act 2016, naipaay kenkuana ti Centenarian Assistance nga aggatad iti sangagasut a ribu a pisos (PhP100,000.00) kasta met a naipaayan iti Centenarian Certificate.
Indauluan da MSWDO Ms. Marivic T. Viesta, Mrs. Wilma B. Asistores, PDO II ti DSWD, ken BLAST Executive President Mrs. Jocelyn O. De Gracia ti pannakayawat dagiti nasao a gunggona ken ni Lola Ansing.
Malaksid iti daytoy, nayawat pay ken ni Lola Ansing ti kuarta a duapulo a ribu a pisos (PhP20,000.00) manipud iti opisina ti ama ti ili a ni Mayor Rodrigo P. De Gracia, CESE.
Manipud Kadagiti Agdama a Kameng ti Bannawag: Dios ti Agngina!
Inamatangan dagiti opisial ti Senior Citizens Association ti nasao nga ili nga idauluan ni Mrs. Marcelina Villanueva, sumagmamano a kameng ti Benevolent Ladies Association of Santa Teresita (BLAST) ken dagiti kalugaran ni Lola Ansing, ti nasao a pannakaited dagiti gunggona.
Maibatay iti rekord ti MSWD, ni Lola Ansing ti maikanem nga umili ti Santa Teresita a naipaayan iti Centenarian Assistance manipud naipakat daytoy a linteg iti pagilian.
Maragsakan dagiti kameng ti pamilia ni Lola Ansing iti naipaay iti daytoy a pammigbig ket sirsirmataenda ti panangrambak daytoy iti maika-101 a kasangayna iti daytoy umay nga Oktubre 18.
Pito ti annak (tallo ti pimmusayen) da Lola Ansing ken daydi Baldomero Belen a pimmusay idi 2005 iti edad daytoy a walopulo ket uppat (84).
Kinuna ti maysa kadagiti annakna a lallaki a mabalin a ti kinadungngo, kinaulimek ken kinadisiplinado ni Lola Ansing ti makaigapu iti napaut a biagna.
Pagaayatna a sida dagiti lames a makalap iti karayan-tamnay, ken dagiti nateng a maar-arnas iti arubayan.
