Ni HONOR BLANCO CABIE
1
nasursurok ngem sangapulo 'diay
sumabat* nakaiggem 'tay adu,
masdaawak, kunak ay-ayda pay --
TURISMO: Intayon Idiay Ayuyang Garden iti Pila, Siudad ti Laoag!
nagballatek a dagus lubongko.
agling-et amin a di agling-et
gapu't kapudotna ti panawen,
ay! ngem aduda a kumapkapet
iti pammati, mangbukelda 'tay pempen.
saanak pay nakapagugis ngem
aributantan 'tay pamay-andan,
lapayagko masemsem 'tay saem,
'ti abayda diak man maas-asian.
kandela, lana ken dadduma pay --
pammatik sadagko di dagidiay.
*maysa a mierkoles, iti sidiran ti
simbaan ti our lady of manaoag,
pangasinan.
2
apagtugaw ni apo padi 'diay
panagis-isemna no rabii
iti sanguanan 'diay pangrabii
tikrab ken isemna agraraay.
ta inaldaw, rinabii awan
sarday deboto a sumangsangpet,
isuda a kanayon a kumpet:
pammati dida a mayaw-awan.
adda pasnek daydiay pammatida,
pammati a mangsalsaludsod 'tay
kaniak naka'd-adu, maasiak
ay! ngem daytat' kadua ti karkarma.
pammatida mangted ‘ti murmuray
ngem dida man masair 'toy riknak.
3
'di rabii adda lailo 'diay
panangibuybuyatna't tudona,
kas man adda yar-arasaasna
pakaigapuan rikna mamurmuray.
anian nga ariwawada idi
mabelbelnasan dagiti adu
a ruot 'ti taltalon 'tanudko,
kas man adu 'tay sagut rabii.
ay! nalipatak nga awanak 'diay
sidiran ti kakellengan a kas
idi agpatpatuboak pay la,
tukak, battog matiltiliw sadiay.
adda pay la met nga umap-apras
ditoy lagip 'tay padas un-una.
4
Narigat ti agsurat soneto iti Iluko. Saludsodenyo
ken ni Honor. Saan a kas iti Ingles a sagdudua ti
silaba. Iti Iluko adu dagiti silaba ti maysa a balikas.
Saan a gapu ta adda 14 lines-mon, addan sonetom.
Tunggal linia iambic.
--reynaldo duque (1945-2013), replying to ast's
question while group of ilocano writers was en route
from bannawag to alfonso, cavite along the coastal
road fronting manila bay for his birthday celebration.
adda bukel a kinaagpayso
daydiay sungbat ni rey 'ti nangngegak
idi addakam dalan ngem kunak
rumbeng 'tay disiplinat' mugingmo.
masapul nga adut' urnongmo, 'tay
adda lawagna a ladawan 'ti
nalablabsam aldaw ken rabii,
ladawan a kenka nakabaklay.
maysa man a ladawan 'diay inka
perperrengen masapul nga adu
daytay adda 'ti tapaw 'ta riknam,
'tay balikas aganges tunggal dua.
umanges sagdudua ingga't ungto
bilangem agmalem ingga't sardam.
