Lima a Daniw ni HONOR BLANCO CABIE1 angep ken tudo immarakupda a simmarabo’t isasangpetmi sakbay nga inabrasat’ rabii ‘toy mugingko, riknak ken karkarma. iti pigsa ti bayakabak, ay! sanguanan ta awan kinalawag, rangkis ta asideg pay met, salbag a biag diak met ita makakidday. masapul in-inayad ti inkam panagsang-at, ti dalan nagalis, adda kaniak daytay panagamak, kas man la adayo daydiay sardam. adut' ar-arasaas ‘toy pispis, kas man inda perperngen ‘toy amak. 2 sabali a siudad ti baguio ‘tay simmabat dagus isasangpetko, adut' tattao nga aggunggunay adda met dagitay agkurkurno. nalabit maarriroak, kunak bimmassit san ti saleng ‘ti siudad, ngem di ngata met agbiddut matak iti ladawan a gumarugad. adda latta met agampayag ‘diay ngatuen ti saleng a natedtedda, yetnagda't karkarmak ‘tay murmuray kas man adda yar-arasaasda. isagid nagpayak iti matak kinaratay nga inkaubingak. 3 angep sidiran saleng ‘ti bantay, ay! addaanda met iti payak, kibuarenda kaniak panagragsak, adda ilagidda a linglingay. daydiay lamiis nga isagidda ta sukisokenda pati sipi, panangsukisokda napnuan umbi, itag-ayda pati ‘toy karkarma. ta labasda a labas dagiti angep kas man guyguyugoyendak, agintutulengak kas man awan mangmangngegko ‘intono rabii.’ saanda nga ammo adda kaduak: ‘toy karkarmak sadino man ti yan. 4 napia pay dagiti kawitan ‘ti siudad ti baguio ta awan tubeng taraokda awan lammin, sardeng, adda ‘diay tapingar pagkakari. awan umaplaw nga angep mangted ‘tay napalalo a panagkukot, riknada't binigat kumudkuddot, adda ‘tay gagarda di maiparnged. talekda pay ‘diay upa’t abayda agkakamakam pannakaimameg, pati pamusian ta awan pulos in-inana't panagbusingarda. tunggal taraok manador adda dam-eg, daytay lailot’ dos por dos. 5 di nasarapan ‘tanudko daydiay insabat kankana-ey nga inna naam-ammo, daras namurmuray, am-amin a lasag ‘diay karkarma. nangruna ‘di sinilpuanna iti nangted panagtigerger ‘diay rikna, daras a naisaneng daytay kari ‘tay gingginednan ta awan ingga. ‘adam isarsardengsa’* -- ay! daydiay ‘tay balikas inna a nangngegan, tikrabna't ginggined agraraay, impanna aminen ‘diay karkarma. ‘naimassa’** -- manen inna kuna, nagballatek a dagus lubongna. *(loose translation) saanmo nga isarsardeng.**(also loose translation) naimas dayta.
Eksklusibo iti Website
