PASUQUIN, ILOCOS NORTE. Naisayangkat ti dua nga aldaw a panagsanay iti panagpatanor ken panagproseso iti uong iti Ilocos Norte Agricultural College (INAC), Pasuquin, Ilocos Norte, idi Mayo 30-31 a nagatendaran ti 36 a partisipante manipud iti San Juan ICAS Maumel Farmers Association iti Pasuquin malaksid iti sumagmamano a mannursuro manipud iti nasao a pagadalan. Nagserbi nga speakers da Mr. Lew Ilaga ken Mr. Roque Mangoma manipud iti MMSU Extension Directorate, da Prof. Fairie Anne Domingo ken Prof. Judelyn Mandac manipud iti MMSU-College of Industrial Technology (CIT), ken Dr. Errol John Valdez manipud iti MMSU-CBEA (umno a panagkontar iti magasto ken mapastrek iti panagpatubo iti uong). Nairaman iti ladawan dagiti kameng ti MMSU Extension Directorate nga idauluan ni Dr. Marilou P. Lucas. Iti akimbaba a ladawan, makita ditoy ni INAC Principal Mr. Almer Anatolio Ratuita (nakatugaw) bayat ti panangipakita kenkuana da (agpakanawan) Ms. Bella C. Gervacio (MMSU) ken Ms. Nina Gracia Pe Benito (INAC) kadagiti naaramid a pickles ken chips bayat ti panagsanay. Adda met iti ladawan ni Ms. Frans Anne Tabangcura ti INAC met laeng. (MRGano)
QUEZON CITY. Ipakpakita ni Alyssa Phoebe Bulong Adul ti diploma ken sertipiko ti pammadayaw a naawatna iti panagturposna iti Senior High School ken ni apongna a lakay, ni dati nga Editor ti Bannawag Dionisio S. Bulong, a di nakapan iti panagturposna gapu ta nairana a nagsakit daytoy. Nakatakder met ni Eden L. Cachola Bulong, apong a baket ni Alyssa Phoebe ken mannurat met laeng ti Bannawag. Full Scholar bayat ti panagadalna iti sekundaria iti Holy Family School, Quezon City, naipaay ken ni Alyssa Phoebe ti Highest Honors iti panagturposna. Naipaay kenkuana ti 17 a medalia a kas pammigbig iti laingna iti nadumaduma a tay-ak a pakairamanan ti Journalism, Communication Arts, ken Mathematics. Ni Alyssa Phoebe ti inauna iti dua a bunga da Dr. Jayson Adul (pimmusayen) ken Dr. Diodena Bulong Adul.
CEBU. Da agassawa a Leo S. Fagaragan ken Dr. Zita N. Fagaragan (paris iti kanigid) ti Pinili, Ilocos Norte, ken da agassawa nga Ernesto ken Judith de los Santos ti Marikina (kasinsin ni Zita) iti Monastery of the Holy Eucharist, am-ammo pay a kas Our Lady of Lindogon Shrine ken gagangay nga am-ammo a kas Simala Shrine wenno Simala Parish Church. Maysa ti Simala Shrine a Romano Katoliko a simbaan a naidedikar ken ni Birhen Maria ken masarakan iti Marian Hills, Lindogon, Simala, Sibonga, Cebu. Binangon idi 1998 dagiti monghe a Marian manipud iti Pampanga. Maysa laeng idi a gagangay a simbaan agingga iti pannakapasamak dagiti kunada a milagro—a maysa kadagitoy ti panaglua ti imahen ni Birhen Maria. (Rinetrato ni Claire de los Santos)
(Bannawag, Hulio 16-31, 2022 a bilang)
