Ti Simbaan ti Sta. Catalina de Alejandria iti Tayum, Abra kalpasan ti 7.0 magnitude a ginggined iti Amianan a Luzon (Hulio 27) a maidilig iti langana a kas makita iti ladawan a naala idi Oktubre itay napan a tawen (baba) ken naaramat nga akkub ti Bannawag iti Maika-87 nga Anibersariona (agpada nga ala ni Alfredo E. Verzosa ti Tayum, Abra).
Kuna ti Philippine Institute of Volcanology and Seismology (Phivolcs) a napasamak ti ginggined iti agarup 8:43 iti bigat a namunganay 3 a kilometro iti amianan a laud ti Tayum, Abra.
Sakbayna, kuna ti Philvolcs a narukod a 7.3 magnitude ti ginggined ngem inaturna kalpasanna a kas 7.0 magnitude.
Nairaman a nadidigra ti Siudad ti Vigan, maysa a UNESCO World Heritage Site, narikna ti ginggined agingga iti Laguna iti abagatan (nupay apagdillaw laeng).
