Uppat a Daniw ni HONOR BLANCO CABIE
1
da kiaw ken pittagaw awandan 'diay
sangat' sagat ken salamagi 'ti
sidiran 'ti indayon a balay
SIDINGAN A DAPAN: Wow, El Nido!
no 'tay agharharanan rabii.
'ti imeng ti dalunit ken agraw
ken dagiti kariskis abayda
addan kaniak ladingit ken aliaw,
'toy muging ken rikna maraprapa.
ta nagpasurongdan, simmurbotdan
nangted ‘ti samiweng a nagpayak,
daras pammatik a nayaw-awan
kinakaubingak a nagpayak.
adda sidduker 'toy barukongko,
immadayon billit 'ti lubongko.
2
Agyaman tayo ken Apo ta nakalasat
tayo manen ti didigra.
--nabasa iti maysa a messenger website
kalpasan ti napigsa a ginggined 'iti
cordillera ken ilokania idi maika-27
ti julio 2022.
awan ti dakesna no puso 'tay
dagdagus nga ingato't dios ama
no 'tay ilasatnatayo't liday
kadagiti pasamak 'ti daga.
ay! ngem agsidsidduker karkarma
'ti kaawan pannakaibilang ti
dadduma a napugsat 'tay rikna:
da daksanggasat a paset puli.
saning-i, sasaibbek ken dir-i
'tay nangsipat ti piditpidit ngem
awan man lat' umabot a kari --
dadduma a sao napnuan saem.
agyamantay ta nakalasattay
ngem di lipatan da addaan liday.
3
naidumat' kinapudnot' asona
'ti amona 'diay aso ti aman
atanudko, 'diay kinapudno ta
naiparangarang 'ti pagaaduan.
ta uken pay la 'di sumangpet 'diay
balay 'diay aso a puraw, ngem spot
ti naganna, ay! di labang, ay-ay
pay 'diay kinapuraw nga adda rimat.
idi nakamassayag pay la 'ti
balay daydiay dakkel ni 'tanudko
nakabantay ni spot 'ti rabii
ken 'ti aldaw – daytat' nasirpatko.
adda ken’ spot ulimek ken lannay,
ammok linugoban isut' liday.
4
pannakaipatungpal
panaglukat pagadalan
nakakambio bulan agosto
paglintegan* dayta nakasaad
mamaestra mamaestro saan nakasagana
mauksoban dagiti agturay mayalud-od bilang
nalipatandan sakit coronavirus bumangbang-es
adu dagiti maraprapa agas-asug agsasaebbek agug-ugis
kinadangkok nakaam-ames sakit a nangkeltay riwriw a biag
ita iduronda latta dagiti ubbing nakakaasida nakaay-ay-ayda.
~natusoda~
nakaay-ayda nakakaasida ubbing dagiti latta iduronda ita
biag a riwriw nangkiltay a sakit nakaam-ames kinadangkok
agug-ugis agsasaibbek agas-asug maraprapa dagiti adu
bumangbang-es coronavirus sakit nalipatandan
bilang mayalud-od agturay dagiti maussoban
nakasagana saan mamaestro mamaestra
nakasaad dayta paglintegan
agosto bulan nakakambio
pagadalan pananglukat
pannakaipatungpal.
*republic act 7797, panaglukat ti klase
adda iti nagbaetan ti umuna a lunes ti hunio
ken maudi nga aldaw ti agosto.
