Uppat a Daniw ni HONOR BLANCO CABIE
1
ni ‘tanudko maysa nga agbirbiray
agsapul ‘tay bagas ar-arapaapna
TURISMO: Intayon Idiay Ayuyang Garden iti Pila, Siudad ti Laoag!
rugiannat’ aggaud ‘diay sadiay baybay
ar-arapaap pagesman gun-odenna.
sadiay baybay kaabay lingsat ‘tay
pagtapogan biray mapan iti taaw
barbareng riknan ‘tanud ‘tay maitag-ay
kadagiti rabrabii kasta met ‘tay aldaw.
labes baybay maal-allingagna sainnek
‘tay adda panagararawna a karkarma
kas man inna ibagbaga daytay tulbek
adda’t saklot kadua itay pay a nabasa.
‘ti sirok kabus a bulan a kumanagkag
namtaar anniniwan nagdekket a barukongda
aggitgiteb agdaldalluyonda ‘ti anges biag
adda irut arakupda gapu’t salemsemna.
anian nga imon bulan kadagiti lamulamo
nasalun-at nga annabo da adan ken eva,
binukodandat’ rabii ken gundaway, atanudko,
saandan makatakder iti biray a luganda.
2
nagsardeng ti tayyek ti lubong ‘di
natuang ‘ti abay tawa ni lakay
nangsegkat tawada ‘ti rabii,
gamut metten inna panagliday.
adda batad nagapo ‘diay baba
iti laksid ti tudo nga addaan
pigsa -- ‘diay timek kabesadona,
ni kayongna nga inaunaan.
daras a napuyupoy ‘diay kingki
pangsilaw ‘di timman-aw ni lakay,
karkarmana idin nagdirdir-i
iti dalaganna’t uneg balay.
‘awanen ni lakay’ indung-awna,
‘ay-aykam pay nga imbatimon ita.’
3
gapu la ‘ti daga a tawidda
iti dakkelda nga ama daytan
nangkeltay ‘tay sanguanan nga addaan
patempateg pati ragragsakda.
patien inauna basbassit ‘diay
apag idilig kadagiti
adienna pay a dua – simrek iti
panunotna – isu ‘tay mangkeltay.
anian kinaangaw daytoy a biag:
gudasem ni kabsat gapu la ‘ti
mangkurkuriro a pammatim? ay!
nalablabeska pay ngem ‘tay salbag.
ibabainmot’ bukod a puli,
sanguanan dios pudno ay-ayka pay.
4
ngem no ngata, panunotko simrek,
ni nangkeltay ti biag ni adina
dakdakkel ‘tay kenkuana naipastrek,
ania ngata komat’ yag-agalna?
siddaawna, adda lablabitna
isut’ kadakkelan iti apag
a talon impaima ti ama –
anian kinaangaw daytoy a biag.
simrek panunotko ta amangan
gudasennan ti bukodna a biag
agsipud ta isut’ kadakkelan,
adda kenkuana ‘tay kinaimbag.
ay-ay pay dagiti kapadana,
bulloda nga agpagpagna’t daga.
