Siam a libro nga Ilokano ti nayalnag itay Agosto 16, 2022 bayat ti “Alnag ken Pammadayaw” nga inwayat ti Saniata Publications ken Saniata Literary Awards.
Agpapada nga impablaak ti Saniata Publications kadagiti tawen 2021 ken 2022, dua kadagitoy ti patarus, 5 ti koleksion/antolohia dagiti sarita, maysa ti koleksion dagiti salaysay ken 1 ti antolohia dagiti daniw.
Ti Sirib ti Puli ni Ilokano ken Dagiti Sagrado a Tay-ak ti Isla Fuga, agpada nga impatarus ni Ariel Sotelo Tabag babaen ti translation grant manipud iti National Book Development Board. Ti Ilokano Folklore a paset ti El Folk-Lore Filipino ni Isabelo Delos Reyes ti immuna idinto a ti Fuga Island: Sacred Escapes ni Dr. Ronel Dela Cruz ti naud-udi.
Karaman kadagiti 5 a koleksion/antolohia dagiti sarita ti Kulukol ti Kilikili a nakatiponan dagiti sarita ni Efren A. Inocencio, ken ti dua a libro nga antolohia dagiti nangabak iti Pasalip Alviya iti 2012 agingga iti 2021—ti Lakasa ti ALVIYA I ken ti Lakasa ti ALVIYA II (is-isponsoran ni Alex Vicente Yadao ken iturturong ni Dr. Freddie Pa. Masuli ti Pasalip ALVIYA); da Juan Al. Asuncion ken Dr. Masuli ti nangedit kadagiti sarita kadagiti dua a libro. Karaman pay iti nadakamat a lima a libro ti Voice Tape ken Dadduma Pay a Napili a nakatiponan dagiti napili a sarita ni Ariel Sotelo Tabag, ken ti Atang ken Dadduma Pay a Sarita a nakatiponan dagiti sarita ni Juan Al. Asuncion, nga agpada a nakaawat iti publication grant manipud iti NBDB.
Manipud Kadagiti Agdama a Kameng ti Bannawag: Dios ti Agngina!
Ti kakaisuna a libro a nakatiponan dagiti salaysay, isu ti Maregmeg ti Lagip ni Arnold Pascual Jose a nakabase iti Hawaii.
Maikasiam kadagiti nayalnag ti Apit nga antolohia dagiti daniw dagiti kameng ti Bangkag, gunglo dagiti ‘mannalon iti balikas’ nga idauluan ni Marlon A. Rodrigo, ken inedit da Tabag ken Oswald A. Valente ti libro.
Ti Salaknib Bookshop ti mangilaklako kadagitoy a libro babaen ti Facebook page daytoy ken iti account daytoy iti Lazada. (Cecile de Guia)
