Ni JUN MARCOS TADIOS
Iti pannakapekka ti 27 anios a guarantee bond (garantia a gatad) a rekisito kadagiti employer a Singaporean no mangalada iti empleado a Filipino, impakaammo ti Department of Migrant Workers (DMW) idi Huebes, Septiembre 8, nga addan 10,000 a trabaho nga agur-uray kadagiti overseas Filipino workers (OFWs) iti Singapore.
Kuna ni DMW Secretary Susan Ople a ti ibibisita ni Presidente Ferdinand Marcos Jr. iti nasao a pagilian, nagbunga iti ad-adu ken nasaysayaat a trabaho para kadagiti mangmangged a Filipino.
Sakbayna, impakaammo ti DMW ken ti Ministry of Manpower (MOM) ti Singapore ti pannakaligsayen ti guarantee bond ken performance bond a S$7,000 ti maysa nga emp;oyer a Singaporean no mangala iti mangmanged a Filipino. Katukad daytoy ti 284,140.79 a pisos iti agdama a gatad a 40.58 pisos ti kada doliar ti Singapore.
Innayon ni Ople a sakbay pay ti ibibisita ni Presidente Marcos, inaprobaranen ti opisina ti DMW iti Singapore ti agarup 10,000 a job order a lima a ribu kadagitoy ti para kadagiti aircraft technician iti industria ti aviation. Dagitoy kaap-aprobar a job order, naisaang para iti madagdagus a pannakaidokumentona iti Philippine Overseas Labor Office (POLO) iti Singapore, ket manamnama a mapirmaan para iti pormalidad kadagiti umay a bulan.
TURISMO: Intayon Idiay Ayuyang Garden iti Pila, Siudad ti Laoag!
Dagitoy dagiti nasao a sangapulo ribu a job order:
Aviation industry – 5,000 aircraft technicians
Medical industry – 3,000 healthcare workers
Engineering industry – 1,000 skilled workers
Education industry – 500 workers
I.T. sector – 300 workers
Mangnamnama ni Ople nga ad-adda pay nga umadu ti panagkasapulan kadagiti mangmangged a Filipino kalpasan ti nabunga nga ibibisita ni Presidente Marcos iti Singapore.
Innayon ni Ople a no maidilig kadagiti pagilian nga agibabaon met kadagiti mangmanggedna kadagiti sabali a pagilian, sumagmamano a bulan ti panagproseso kadagiti papeles imbes a lawas laeng. Ngem babaen ti digitalization ken ti naidumduma a kabaelan ken dedikasion dagiti mangmangged a Filipino, manamnama ti yaadu ti panagkasapulan kadagiti OFWs saan laeng iti Singapore no di pay iti sabsabali a paset ti lubong.
(Damag manipud iti Manila Bulletin.)
