Naluktan itoy nga aldaw, Septiembre 27, ti Bulnog Iloko Creative Writing Course, proyekto ti Gobierno Probinsial ti La Union (PGLU) nga idauluan ni Gob. Rafy Ortega-David babaen ti opisina ti Culture, Arts and Language ti Provincial Tourism Office.

Libre daytoy a panagadal iti lengguahe ken panagsurat a kas maysa kadagiti nayon nga addang iti sapasap a pannayimplementar ti Language Code ti La Union (Iloko Code).

Nabirngasan iti “Bulnog” a kayatna a sawen “Kinaekselente,” makitinnulong iti daytoy a panagsanay ti  Don Mariano Marcos Memorial State University (DMMMSU) - MLUC a nangidiaya iti venue ken ti Gunglo Dagiti Mannurat nga Ilokano (GUMIL) a paggapuan dagiti aglektiur.

Iti umuna a serye ti ababa a kurso, maisayangkat dagiti uppat a modiul a kas sumaganad:

Sept. 27, 9:00 am - 5 pm: Ti "Iloko Code of La Union" ken ti maaramat nga ortograpia, Djuna R. Alcantara;

Sept. 28, 9 am - 5 pm: "Panagsurat iti Damag" kadagiti nadumaduma a plataporma, Dr. Edilberto H.  Angco;

Okt. 11, 9:00 am - 5 pm: "Panagsurat iti Salaysay" a kas aramaten dagiti LGUs kadagiti para iti kultura ken turismo a programada, Neyo E. Valdez; ken

Okt.  12, 9:00 am - 5 pm: "Ti Panagsangal iti Daniw” a kas literary tool iti idudur-as ti kultura,  arte ken lengguahe  iti La Union, Prof. Junley Lorenzana Lazaga. (D.R. Alcantara)