Ni ELISEO B. CONTILLO
LGU Santa Food Allocation Subsidy – Pirpirmaan da Mayor Jesus  Bueno Jr. ti Santa, Ilocos Sur ken ni National Food Authority Ilocos Branch Manager Jonathan U. Corpuz ti Memorandum of Agreement  a mangirusat iti  Assistance Program for Legislators and Local Government Units (PALLGU) a tumulongan dagiti gobierno lokal kadagiti mannalon babaen ti panangnayonda iti presio a paggatang ti NFA iti apit  dagiti mannalon. Babaen ti ordinansa nga ”LGU Santa Food Allocation Subsidy” a pinutar a mismo ni Bise Mayor Jesus Jeremy Bueno III ti Santa, nangilatang ti LGU iti P1,000,000 a para iti nasao a programa tapno agbalin a P23/kg ti presio ti irik manipud iti P19/kg a paggatang ti NFA a nayonan met ti gobierno probinsial ti llocos Sur iti P1/kg.

Manamnama a matulongan dagiti mannalon iti Santa, Ilocos Sur, nangruna dagiti agmulmula iti pagay, babaen ti panagtinnulag ti LGU Santa, iti panangidaulo ni Mayor Jesus Bueno Jr. ken ti National Food Authority a magatang dagiti apit nga irik iti lokalidad iti nanginngina a presio.

Kas impakaammo ni Bise Mayor Jeremy Jesus Bueno III, mangilatang ti gobierno lokal iti PhP1-milion para iti LGU Santa Food Allocation Subsidy a paggatang iti  apit dagiti mannalon iti Santa iti nangatngato a presio.

Iti katulagan ti LGU Santa ken ti NFA, manayonan iti P3 ti P19/kg a paggatang ti NFA para iti Class A; P18/kg  para iti Class B, ken P1/kg ti inayon ti gobierno probinsial.

Kayatna a sawen nga agbalin  ti Class A: 19+3+1  a P23/kg, ken ti Class B: 18+3+1 ti P22/kg.

Inlawlawag pay ni Bise Mayor JJ Bueno a ti  Santa Federated Farmers ti core group wenno mangurnong iti magatang nga irik tapno naur-urnos.

Inkeddeng ti LGU Santa a tumulong ken makibinnuligda iti NFA ken panangilatangda iti palay subsidy gapu ta agbaliwbaliw ti presio a paggatang ti irik.

“Ti palay subsidy ket para laeng kadagiti agindeg iti Santa,” pangilawlawag pay ni Bise Mayor JJ Bueno.