Ni ELISEO B. CONTILLO

Pormal a nagsapata ni SBM Caloy Valera iti sango ni Mayor Pablito Sanidad itay bigat iti daytoy nga aldaw, Oktubre 24, 2022, a kas baro a bise mayor ti Narvacan, Ilocos Sur.

Simple ti naiwayat a seremonia nga inatendaran laeng dagiti dadakkel ti baro a bise mayor, da dati a Bise Mayor Antonio Valera ken Mrs. Glory C. Valera.

Sinuktan ni Valera daydi Dios-ti-aluadna a Bise Mayor Engr. Joseph Tejada a pimmusay idi Setiembre 23, 2022 gapu iti atake iti puso.

Maysa a Certified Public Accountant, nagretiro iti Bureau of Customs sakbay ti panagkandidatona itay kallabes nga eleksion a nakagun-odanna iti numero uno a puesto iti Sangguniang Bayan ti Narvacan. Kas lider sibiko, agpapaay iti agdama a presidente ti Rotary Club of Narvacan.