Lima a mannurat nga Ilokano ti nangabak iti 2022 Gawad Bienvenido Lumbera nga insayangkat ti National Committee on Literary Arts (NCLA) ti National Commission for Culture and the Arts (NCCA).

Iti salip iti daniw, nangabak da Ariel Sotelo Tabag (Umuna a Gunggona babaen ti koleksion ti daniwna a “Manen, Adda Umuna ken Dadduma Pay a Daniw”), Daniel L. Nesperos (Maikadua a Gunggona babaen ti koleksion ti daniwna a “Salamangka ken Dadduma Pay a Daniw”), ken Jobert M. Pacnis (Maikatlo a Gunggona baben ti koleksion ti daniwna a “Tao ken Dadduma Pay a Dandaniw”).

Iti salip iti sarita, nangabak met da Jefferson M. Somera (Umuna a Gunggona babaen ti saritana a “Dagiti Bao iti Bantay Nabigahan”), Prodie Gar. Padios (Maikadua a Gunggona babaen ti saritana a “Ni Serendipity iti Lubong Dagiti Kurarapnit”), ken Ariel Sotelo Tabag (Maikatlo a Gunggona babaen ti saritana a “Wayá”).

Maiwayat ti online a pannakayawat dagiti premio inton Nobiembre 16, 2022.

Mairaman pay a mapadayawan dagiti mannurat a nangabak iti salip kadagiti dadduma pay a lengguahe a kas iti Filipino (Maikling Kuwento, Sanaysay, Tula), Cebuano (Sugilanon, Balak), Hiligaynon (Sugilanon, Binalaybay), Waray (Susumaton, Siday), Kapampangan (Poesia/Kawatasan), Bikol (Osipon, Rawitdawit).

Awan nangabak iti Pangasinense: Tula (Anlong) ken Kuwento (Antikey a Tongtong); Bahasa Sug: Tula (Tarasul); ken Meranaw: Tula (Bayok).

Kanaig daytoy, mangipaay ni Tabag iti mensahe a kas pannakabagi dagiti amin a nangabak kadagiti amin a kategoria ti salip.

Daytoy ti umuna nga edision ti pasalip ti NCLA-NCCA a naipanagan ken ni National Artist Bienvenido Lumbera, tubo ti Lipa, Batangas (Abril 11, 1932- Septiembre 28, 2021). Inisponsoran daytoy ti  Curia Sancti Rosaii, Inc.