Lima a Daniw ni HONOR BLANCO CABIE
1
Batangmi ita, batangyo no bigat.*
--karatula iti pagserkan ti maysa
a kamposanto iti ilokandia.
5 a Daniw
makapakintayeg, atanudko,
daydiay karatula a naisab-it
'ti ruangan kamposanto, ay! pudno,
kasla sumagsagitsit a sal-it.
imbes dumawatda't kararag 'tay
kumarkaramut pay la 'ti daga
ibagbagadan nga adda sadiay
daytay paginggaan, ungtot' dana.
immun-unada laeng a napan
sadiay labes bantay, ay! ngem adda
mensaheda: di maliklikan kan
'tay panagpanaw 'ti rabaw daga.
a la ket agkararag 'tay ngarud
tapno awan pulos 'tay maisagud.
*(naadaw daytoy iti Latin: Hodie
nostra schedula, cras tua.)
2
mangraprapa idi la rabii,
mangtittitileng pay panagdung-aw
iti sipnget bumang-es 'tay aliaw
umisem ta manen nakaipakni.
barukong dagiti nakapanes
barbarrenaen man daytay apges,
napanen 'diay ipatpateg labes
bantay – mataltaltal daydiay pispis.
nalpas sinadagen, nagminatay
awanen 'tay mapunasda a lua,
agsapan kas pay la a rabii
gapu't lukab mata nga aglidliday.
napanen 'ti sabali a daga
ipatpateg nabati a puli.
3
el panteon* 'diay tinoktokarmi 'di
'diay atong 'ti balay rumayrayray,
agdumog 'diay pul-oy 'ti rabii,
danggayannat' tokar a naliday.
irakrakurak atong ti balay
iti taeng adda pimmanawen,
adut' kabagian met a dimmar-ay,
ta immarayatda a kas pangen.
ita nga aldaw kuyogenmin daydiay
namagaruyot luat' ubbing pati
nataengan, tokarmi naliday:
mariknak pannakabekkel puli.
ama a mannakabalin ikkam
kappiat' panunotda't labes sardam.
*mairaman ditoy ti marche funèbre ni frédéric
chopin, immuna a natokar idi 1830. limgak iti
maikatlo a parte iti maikadua a sonata iti B-flat
minor.
4
oremus pro oblivione.*
--manipud iti padi a katoliko,
naadaw iti sermonna bayat
panangmismisana iti maysa
a kamposanto kadayta a piesta
dagiti minatay.
manon a daras a napankam 'diay
kaaduan ti kadena de amor:
'tay bombardino, kornetin, tambor
ken klarinete addaan liday.
iti bakrang, sidiran ken surbot
pagul-uldagan 'tay panteon nga adu
adda nangkurkuriro't mugingko,
ararawda inda inkudkuddot.
narupsan 'diay lasag pinagtangsit
iti immun-una a panawen,
kano isudan nalipatandan
awanen samiweng napnoan sam-it.
innaldaw makakitada't pangen,
ay! ngem isudan 'tay malablabsan.
*iti pagsasao ni ilokano: iramantay
nga ikararagan da itan nalipatan.
5
'toy muging ken matak no addakam 'ti
baet panteon a kappintura ta
adda mangngegda nga agdirdir-i
'diay dilada awan lamuyotna.
kayatda met kanot' matokaran,
kas man pangep-epda't panagliday,
daytoy barukongko maas-asian
limdo 'ti karkarmak awan sarday.
no kornetin ken klarineten 'tay
agsangit manglapunos angin 'ti
masansan naulimek a bantay
makitadat' rayray ti rabii.
daytoy innak panagpuyot, ama,
kiddawko dagus maisalakanda.
