Rimmuaren iti imprenta ti dua a libro ti Alex Vicente Yadao Literary Foundation (ALVIYA), ti Lakasa ti ALVIYA I ken Lakasa ti ALVIYA II.

Dagitoy dua a libro ti nakaurnongan dagiti amin a nangabak a sarita iti maysa a dekada a panagpasalip ti ALVIYA iti panagsurat ti sarita. Iti pannakitinnulong ti Saniata Publications, daytoy a proyekto a panagilibro ti nagbalin a sandi ti pasalip ita a tawen 2022.

Inurnong ken inedit da Bannawag Literary Editor Juan Al. Asuncion ken Dr. Freddie Pa. Masuli, nabingay iti dua a libro dagiti 42 a sarita a sinurat dagiti mannurat nga Ilokano iti Filipinas ken iti ballasiw-taaw.

Naipalaon ti 22 a sarita a nangabak manipud 2012-2016 iti Lakasa ti ALVIYA I nga impaayan iti panangiladawan (blurb) da Bannawag Editor Cles B. Rambaud ken Junley L. Lazaga ti UP Baguio, idinto a 20 met a sarita a nangabak iti tawen 2017-2021 iti Lakasa ti ALVIYA II nga impaayan iti panangiladawan da Dr. Roderick Galam ti Oxford Brookes University ti Oxford, England, Leonardo D. Tejano ti Mariano Marcos State University (MMSU) ti City of Batac, Ilocos Norte ken Mark Louie Tabunan ti University of the Northern Philippines ti Vigan City, Ilocos Sur.

Daytoy a proyekto ket resulta ti agtultuloy a tarigagay ni Alex Vicente Yadao, isponsor ti tinawen a Pasalip ALVIYA iti Sarita a panagurnong ken panagidulin kadagiti dekalidad a piesa ti literatura ni Ilokano tapno adda madadaan a reperensia para iti panagadal iti kina-Ilokano ti agdama ken sumarsaruno a kaputotan.

Maiwaras dagiti Lakasa kadagiti autor a nairaman iti antolohia, kadagiti nakipaggamulo iti pannakaisaganana ken kadagiti unibersidad iti amianan a pakairamanan ti Cagayan State University, Isabela State University, Quirino State University, Nueva Vizcaya State University, Mariano Marcos State University, University of Northern Philippines ken Don Mariano State University.

Addanto met maimaldit a mailako iti nababa a presio kadagiti agtarigagay a maaddaan iti kopia.

Nayalnagen (soft launch) dagiti Lakasa idi Agosto 12 bayat ti maika-51 a panagkasangay ni Alex Vicente Yadao sadiay Libertad, Abulug, Cagayan ken iti online awarding ceremonies ti Saniata Literary Awards idi Agosto 16, 2022.

Pormal a mayalnag dagitoy iti “Panagkayas Kadagiti Balikas,” serye ti seminar-workshop nga is-isponsoran ti GUMIL Cagayan, a maangay iti daytoy Oktubre 29-30 iti Estepa Organic Farm, Iringan, Allacapan, Cagayan.

Ipakaammo met ti ALVIYA Secretariat a maisagsaganan ti pannakalukat ti maikadua a siklo ti panagpasalip iti panagsurat iti sarita a mangrugi iti tawen 2023. (FPM)

(Naipablaak iti Bannawag iti Nobiembre 1-15, 2022 a bilang.

Kadagiti kayatna ti ag-subscribe iti e-Edition, mapan iti Press Reader wenno Magzter.

Para iti naimaldit a kopia, kauman ni Boy Balanag iti CP Number 0916 269 2390

Para iti pakaseknan dagiti sinurat, ag-email iti [email protected].

Laglagipenyo koma, kakailian, nga i-follow ti Bannawag iti Instagram ken i-like ti Bannawag iti Facebook. Dios ti agngina.)