Pimmusay ni Antonio P. Urata Sr., mannurat ti Bannawag, iti edadna a 73, sumagmamano nga aldaw kalpasan ti Piesta Dagiti Natay (Piesta Dagiti Kararua).

Nagpaay ni Apo Urata a kas mannursuro iti pagadalan ti gobierno.  Immakar iti Ministry of Human Settlements sa manen iti Housing and Land Use Regulatory Board (HLURB) a nagbalinanna a Regional Director iti Region 2 ken CAR, nga isu metten ti nagretiruanna.

Kas mannurat, adu dagiti gapuananna a salaysay ken daniw a kaaduan kadagitoy ti naipablaak iti Teacher's Journal.  Nagpaay a kolumnista iti maysa a pagiwarnak ti probinsia, nagpaay pay a presidente ti GUMIL Cagayan (1985-2001), kameng ti Board of Directors ti GUMIL Filipinas, ken bise-presidente ti GUMIL Filipinas (1989-1993).

Inulila ni Apo Urata dagiti nabati pay a lima a kakabsatna a da Carlina, 89; Segundo, 88; Jose, 78; Arthur, 69; ken Leonardo, 66; kasta met ti kaingungotna a ni Leonora, dati nga School Head iti public high school; ti kakaisuna a lalaki nga anakda ken kakaisuna met a nabati iti tallo nga annakda a ni Dr. Antonio Urata Jr., ken ti apokoda a ni Toby.

Nakamassayag ti bangkay ni Apo Urata  iti Funeraria Ortiz, Diversion Road, sango ti Florida Bus Station.

Maitabon ni Apo Urata inton Nobiembre 9, Mierkoles. Alas otso iti bigat ti pannakaimisana iti Sto. Nino Church, San Gabriel, Tuguegarao City. (Jun Seguro)