Naipaayan iti kuarta nga insentibo dagiti 580 nga Ilocos Sur Educational Assistance and Scholarship Program (ISEASP) graduates Batch 2022 manipud iti gobierno probinsial. Aggatad iti PhP1,000 ti naited iti tunggal scholar.  Dakdakkel met ti naited kadagiti 188 nga addaan iti Latin honors. Immawat iti PhP30,000.00 dagiti nagturpos a Summa Cum Laude, PhP20,000 kadagiti Magna Cum Laude ken PhP10,000.00 kadagiti Cum Laude.  Indauluan da Gob. Jeremias “Jerry” Singson ken Bise Gob. Ryan Luis Singson ti pannakayawat dagiti insentibo bayat ti naangay a programa iti Provincial Farmers Livelihood Development Center iti Siudad ti Vigan itay Nobiembre 7, 2022.

Iti panagsarita ti gobernador, kinunana a daytoy a programa ti Gobierno Probinsial ti saan a pulos a masayang ta agbalin a puonan daytoy tapno masigurado ti nasayaat a masakbayan saan laeng a dagiti agtutubo no di ket ti Ilocos Sur a kas probinsia.

Inawat ni Edgar Loquiao, naggraduar a Summa Cum Laude (maikapat manipud iti kanigid) ti Resolution of Commendation manipud kada Gob. Jeremias “Jerry” Singson (maikapat manipud iti kanawan) ken Bise Gob. Ryan Singson (maikatlo manipud iti kanigid). Inimatangan daytoy da (agpakanawan) PFSK President Janina Joyce Tabios, SPM Ronnie Rapanut, SPM Francisco Arturo Ranches III, SPM Art Constantine Oandasan ken SPM Christopher Baterina. (Pammadayaw ti Opisina ti Gobernador ti naaramat a ladawan)

Immawat pay dagiti honorees iti Resolution of Commendation manipud iti Sangguniang Panlalawigan ti Ilocos Sur a kas pangbigbigna iti akem dagitoy iti naranraniag pay a masakbayan ti Ilocos Sur.

“Maysa laeng ti dawatko. Ipagpannakkelyo koma a dakayo ket scholar ti probinsia,” kinuna met ni Bise Gob. Ryan Luis Singson.

Nagturpos dagiti iskolar kadagiti State Universities and Colleges iti Ilocos Sur a kas iti Ilocos Sur Community College, Ilocos Sur Polytechnic State College, North Luzon Philippines State College, ken University of Northern Philippines. (Mancielito S. Tacadena)

Ni Gob. Jeremias “Jerry” Singson iti panagsaritana iti programa itay Nobiembre 7, 2022. (Pammadayaw ti Opisina ti Gobernador ti naaramat a ladawan).