Lima a Daniw ni HONOR BLANCO CABIE
1
burubor, waigka't lugar innak
dinakkelan, nangted panagrayray
'toy mugingko kasta met 'toy riknak,
Manipud Kadagiti Agdama a Kameng ti Bannawag: Dios ti Agngina!
sinagsagutannak ‘ti murmuray.
adu a kuros, bunog, ken kappi
imburaymo inkam nagpasaran,
intedmo 'tay pamigsa ti puli,
sabsabongka't bibig nagnagnaan.
ay! ngem awan metten agayus 'diay
baet sidiran 'ta bakrang, itan
lames awandan ngem panagliday,
addan isasaibbek 'toy pinggan.
burubor, apay a pimmanawen
da addaan ti nanam a pangen?
2
panagtakderko 'diay sadiay baybay
sinagid angin 'toy lapayagko,
itay yar-arasaasna adu
'toy muging ken riknak maitagtag-ay.
iti inyarasaasna innak
nakita da agkakalugaran:
da tata andong, marcos, mang binan,
da mang islaw -- rimmayray 'toy matak.
iti amianan yanko, 'diay lingsat,
nakitak 'diay panagisibuagda
kadagiti tabukol imbaklay:
barangan ken udang namagrimat.
daras nangngegko 'diay garakgakda,
nakitak isemda ken 'diay kidday.
3
da nagbayengyeng nga ubbing sadiay
pagpagnaanda no agawiddan
manipud pagadalan, ay! taray
pardas di maitudo 'diay mukoddan.
ta dagiti mapan agkalap 'diay
baybay no masabetda 'diay ubbing
bayengyeng nga ilemlemmeng daydiay
daras a gammatan -- isut' sarming.
daytat' sarming 'tay gasat nga addaan
imbag, 'tay gasat mangpunno't alat,
ay! ngem napardas 'diay ubbing, awan
mayat a biktimat' pananggammat.
anian a tapokna 'diay pagnaan
no da mangngalap 'diay masabatdan.
4
iti naminsan a malem innak
namataan da tata andong 'diay
pagpagnaanda a mapan baybay,
awan 'tay tapok immapras matak.
babbai nga ubbing masabatda,
nariknak nga awan bayengyeng 'ti
sangnguanan 'diay bestida -- naipakni
ngata? saludsod muging ken rikna.
addan edad da tata andong, da
mang islaw, tata marcos, tito pay,
ngem no babbai 'diay masabat 'ti
dana urbanidadda 'diay adda.
nangtedda met kaniak 'tay imbaklay
nga adal a nangted bisked puli.
5
saanakto mayaw-awan -- daydiay
masansan a mangngegko't karkarmak
iti panagpaspasiarko't bantay,
'diay turod ken kelleng dinakkelak.
imbatit' karkarmak iti riknak,
iti adda ganusna a mugingko
no 'tay idi magnaak 'ti tambak --
adda 'tay arasaas lubongko.
diakto met a mayaw-awan, adu
'tay nangpaanges muging ken riknak,
nangted bisked iti panunotko,
bisked mangiwanan kaniak danak.
kas met 'tay karkarmak saanakto
mayaw-awan, sulisog man adu.
