Daniw ni DANTE AGONOY
(Para ken ni Kaanakan Jhong Jhong Caluducan ti Pudtol, Apayao a pimmusay itay nabiit gapu iti desgrasia iti motorsiklo)
“Pinanawannakon ni Papa, awanen
Ti mangitulod kaniak a mapan eskuela.”
Balikas ti putotmo a kasla nangpigpigis iti puso
Pito laeng ti tawenna, nariknanan ti saem
Manipud Kadagiti Agdama a Kameng ti Bannawag: Dios ti Agngina!
Ti inna pannakaulila; lulua nga umarubos
Panunotmi dimi man maurnos.
Adu nga ubbing, babbaket, lallakay
Ken papagayam immay makipagladingit
Napnuan saibbek, lulua ken dung-aw
Ta ti biagmo ditoy daga napnuan ayat
Naipariknam kadakuada ti pammategmo.
No tumabunoka iti intay panagtitipon
Balonmo ti nadumaduma nga apitmo
Aba, saba, pako, alukon
Sa ikidday, yarakup, yarasaasmo,
“Uncle, dagitoy laeng, innak ipasarabo.”
Yarikapkonton sarabom
Sarunuen ti makapnek nga isemmo.
Naata a bunga , sika 'tay napuros
Ngem saan, saan a ti kinaatiddog ti biag
Ti inkam pagsarmingan a napanawam
No di ket ti adu a nangipariknaam iti ayat
Dungngo, tulong ken pannarabay,
Pakalaglagipanmi nga inka pinanawan.
Ngarud, ayat ken kararag ti inkam ipabalon kenka
Ipeksami a diminto baybay-an dagiti inulilam
Gapu iti imbatim a pakalaglagipan
Nabalitokan a pagadalan ken pagwadan
Nagturposka iti daytoy a biag a mapadayawan!
(Tubo ti Bacarra, Ilocos Norte ti autor. Retirado nga opisial ti London Metropolitan Police Service, London, United Kingdom; agnaeden ti autor iti London.)
