Ni ELISEO B. CONTILLO
SANTA, ILOCOS SUR. Pormal a nayawat ti nabiit pay a nairingpas a Santa Resettlement Project babaen ti National Housing Authority (NHA) kadagiti benepisiario nga umili iti daytoy nga ili.
Limapulo a Duplex Type Housing Units ti nabangon iti Barangay Labut. Narugian babaen ti Resettlement Assstance Program for LGU a proyekto ken pinonduan ti NHA idi Hunio 1, 2021 ken nairingpas idi Marso 2022, kas impakaammo ni Acting NHA Regional Manager ti Region 1 ken CAR Engr. Jefferson F. Ganado.
Kinuna ni Mayor Jesus Bueno Jr. a dakkel a tulong ti resettlement project kadagiti umili ti Santa ta 50 a pamilia ti nakasagana a maibalay iti housing project. Maikaduan daytoy a housing project ti Santa LGU. Umuna ti nabangon iti Barangay Pasungol.
Nangipaay ti NHA para iti Santa Resettlement Project iti pondo nga aganay a P24,955,133 idinto a counterpart ti LGU Santa ti P13,000,000 ti pategna a daga a nakabangonan dagiti housing units.
Manipud Kadagiti Agdama a Kameng ti Bannawag: Dios ti Agngina!
Iti panagsarita ni Bise Gob. Ryan Singson, impeksana ti panagyamanna iti gobierno nasional iti pannakaisayangkat ti nasao a proyekto. Kinunana pay a sindadaan ti gobierno probinsial a tumulong kadagiti proyekto a para iti pannakaitag-ay ti kasasaad dagiti umili ken nagyaman pay ken ni Presidente Bongbong Marcos. Innayonna a mangnamnama nga agtultuloy daytoy a programa iti babaen ti presidente.
Dinayaw met ni Engr. Jefferson Ganado ti LGU Santa iti panangidaulo da Mayor Bueno ken Bise Mayor JJ Bueno gapu iti kinaalibtakda a nanginaw ken nangisagana kadagiti rekititos iti pannakaisayangkat ti proyekto. Kinunana nga itultuloy ti NHA ti pannakaisayangkat dagiti kastoy a proyekto a pagbinnuliganda kadagiti gobierno lokal.
Mabalinen a pagyanan dagiti housing units ken ti laengen water system ken koriente ti kurangna. Asideg daytoy iti mabangbangon a baro a merkado publiko ti Santa met laeng.
