Ni ABRAHAM C. AGUINO JR.
NO higante dagiti kapulpulapolmo, kabalbalubal ken kaduam a timmanor, mapilitanka a mangiruar amin a kabaelam, tured, pigsam ken kinalaing tapno agballigika. Nagasatak ngarud a natenneb, namuli ken naibilang a kameng ti Class 1987 ti dati a St. Lawrence Academy (St. Lawrence the Deacon Academy itan), ti kakaisuna a Catholic school iti Bangui, Ilocos Norte.
Saankami laeng a nakaradkad no di ket nakaay-ayatkami pay. Malagipko la unay iti naminsan a pinagmulanakami ti maestromi iti mani ket nasdaawkami ta awan met la agtubon. Gayam, kas impudno ti klasmeytmi, kinurobna sa insakmolna a sinaruno dagitoy bayat ti panagmulmulami. Pudno a nakakatkatawakami ta tumayab pay idi dagiti eraser kada chalk no mapagpungtotmi dagiti maestrami a manarimaan a mangisursuro.
No saanak a mariro, dakamin sa ti kadakkelan a nag-first year iti St. Lawrence Academy iti bilangmi a nasurok a limapulo. Daksanggasat ta saankam amin a makastrek iti top ten honor students isu nga immakar dagiti dadduma iti sabali a pagadalan iti simmaruno a tawen. Ngem addan sa met nabati a nalalaing kadakami ta idi addakam iti third year, inatiwmi dagiti fourth year iti quiz bee. No madama pay ti klase idi kunam no nakapaspasnekkam nga agad-adal. Gayam, agbasbasakami ti detective novels a Hardy Boys and Nancy Drews nga inlingedmi iti notebook-mi.
Panawen pay laeng ti NCEE idi. Nakatagtagarikami iti bus a napan nag-exam. Pati ti konduktor ket nakisinsinnutil ket imbagana pay a baka siak kano ti mang-top ti eksam. Ti katkatawa ti pinangik-ikkatmi ti dandanagmi.
Manipud Kadagiti Agdama a Kameng ti Bannawag: Dios ti Agngina!
Dimteng ti aldaw a pinadpadaananmi, ti inkam panagturpos iti hayskul. Napnot’ ragsak daydi nga aldaw nupay saanak a napagasatan a maysa kadagiti honor students. Ti valedictorian-mi ket ni Aileen Acoba Garvida, a maysan a nurse idiay Chicago, USA. Ni met Carolyn Calipjo Garvida ti salutatorian, agnaed metten idiay Seattle. Ti first honorable mention ket ni Marjoe Go Martinez, maysa a retired nurse a agindeg itan idiay Alberta, Canada. Ni met Noemi Ruth Agullana Ancheta ti second honorable mention, maysa met lang a nurse nga adda metten idiay California.
Third honorable mention ni Gina Marie Garvida Day, nurse met lang nga adda’t Illinois. Fourth honorable mention ni Lalaine Manegdeg Lampitoc, naggraduar met la a nurse nga agob-obra ita idiay Dubai. Fifth honorable mention ni Laureto Padawan, Jr., nakalpas ti A.B. Philosophy ken masteral nga agnaeden idiay Vancouver. Nalpay man ti abagak a saan a napagasatan kadagiti honor students idi bimtak ti sipsipat iti pannakayawag ti naganko a kas NCEE topnotcher daytoy a batch. A.B Philosophy met ti tinurposko ket mangisursuro ita iti Bangui National High School.
Dagitoy pay ti dadduma a batch-mi (by alphabetical order): Rodel Acantilado, self-employed; Richofen Arafiles,Education graduate ngem agob-obra itan iti korte ti MCTC idiay San Fernando City, La Union; Frederic Batilo ken Estrelita Medina Batilo, agassawa a nakapagpabasa metten kadagiti tallo nga annakdan a rason ti pannakapilida a Model Family ti Ilocos Norte; Rhoderick Erice, maysa a seaman; Ernesto Gamiao, maysa a businessman; Dennis Garon, nagturpos iti BS Business Administration; Orlando Paganao, agdama a barangay treasurer ti Cabaritan, Dumalneg; Jerry Ruiz, maysa a construction worker; Engr. Larry Sunga, maysa a businessman; Richard Torres, agnaeden idiay Hawaii; agkabsat nga Arnulfo Agreda ken Eliza Agreda Martinez, hairdresser;
Margarita Alupay Cham-ag, self-employed; Carmelita Cabradilla Abnasan, nag-retire a midwife ti RHU ti Adams, Ilocos Norte; agkabsat nga Analyn Daňo (nakalpas ti cosmetology ken dressmaking) ken Luwalhati Daňo Ventura (nakalpas ti nursing ken nakapagbasa met ti dua nga annaknan); Marites Garvida Agoy, mangisursuro iti Bangui Central Elementary School; Atty. Margie Gines Laroya, clerk of court ti RTC, Bangui, I.N.;
Caroline Go; Mary Jane Gonzales Galang, maestra; Miriam de Guzman West, agnaeden iti Hawaii; Corazon Jaramillo, businesswoman; Evangeline Malapit, nagraduar a nurse ken nakapalpas met ti tallo nga annaknan; Luzviminda Medina; Rubelyn Ortega Velasco, nakapagadal metten ti dua nga annaknan; Alma Palima, agnaed metten idiay Hawaii; Chona Paulino, agindeg met iti Hawaii; Emily Reyes, nagturpos met ti nursing; Jocelyn Sumugat Cabellon; ken, Resureccion Tapia Tahilan, adda met idiay Hawaii.
Addada met napapaunami met a kaklaseanmin a napanen iti sabali a biag; da Ramel Burgos, Freddie Campaňano Edgar Suniga, Marites Bitongcol ken Adona Guerrero. Gapu ta lumakay met ‘toy numon, pamakpakawanan dagiti dadduma a kinaklaseanmi no adda man diak nalagip ket saan a nairaman iti daytoy a class history.
Ita a tawen gapu ta limmukay metten ti kinaiget maipanggep iti pandemia ti COVID-19, naaddaankami iti gundaway a nangselebrar ti maika-35 a tawenmi nga agkaklasean babaen ti panangbuangaymi iti series of reunions a nagngudo idi Nobiembre 27 ken ita a 28 ti bulan. Naragsakkami unay ta 19-kam a timmabuno, kadadakkelan pay laeng a bilangmi no diak mariro. Naangay daytoy iti Ramiscal Mountain Resort iti Lanao, Bangui, I.N. Napunno daytoy a panagkikita iti is-istoria, katkatawa, kankanta, salsala, ay-ayam, pangpangan ken nabara nga ab-abrasa. Addada saan a nakaumay ngem nasaksianda daytoy a naisangsangayan a pagteng babaen ti panagi-videomi ket nakipagpasetda iti adu a suportada kasla koma kadagitay kaklaseanmi idiay abroad a sindadaan a nangilukat iti naayat a panagpuspusoda babaen iti adu a sagutda tapno naballigi met laeng daytoy a reunionmi.
Naggibus ngarud daytoy a ramrambak babaen iti pannakaangay ti Thanksgiving mass ti SLA Class 1987 iti parokia ti St. Lawrence the Deacon itay bigat (Nob. 28) a nangidawdawatanmi metten iti talinaay dagiti kaklaseanmi a pimmusayen. Innalami met daytoy a gundaway a nagyaman kadagiti nagbalin a mamaestra ken mamaestromi a nangmuli kadakami tapno madanonmi dagiti nagtengmi iti biag ken iti Naayat a Namarsua a kankanayon a mangtartarabay, mangsalsalaknib ken mangbembendision kadakami manipud pay idi un-una. --O
