Ni BERNARD LUMAOIG
Dr. Mary Hazel Brigola Ballena

Maysa a prinsipal iti eskuela elementaria ti Abra ti naibilang kadagiti uppat a mannursuro a nagrimat ti naganda iti kalleppas a Southeast Asian Educational Innovation Awards (SEA EIA) a naangay iti Thailand. Naangay ti seremonia ti pammadayaw iti Royal Orchid Sheraton Restaurant and Towers bayat ti 45th SEAMEO High Officials meeting itoy nga aldaw, Nobiembre 29.

Napadayawan ni Dr. Mary Hazel Brigola Ballena, dati a Prinsipal ti Bucay North Elementary School iti Abra, gapu iti pinarnuayna a TEACH TALK (Teachers’ Engagement, Action, and Commitment in Assisting Learners at Home to Think, Ask, Listen, and Build New Knowledge).

Nangabak ni Dr. Ballena, agpapaay itan a Prinsipal ti Pagala West Elementary School iti Bucay met laeng, iti kategoria ti School Head Innovations.

Malaksid ken ni Dr. Ballena, dua pay a Filipino ti napadayawan, da Joana B. Romano ken Rowan L.  Celestra; ken maysa nga Indonesian, ni Betya Sahara.

Maysa a Master Teacher I manipud iti Melencio M. Castelo Elementary School iti Payatas, Quezon City ni Romano a nangabak iti Teachers’ Innovation Category para iti pannakapasayaat ti gapuanan iti matematika ken panagbasa (reading) dagiti adda iti kindergarten babaen dagiti digital applications (apps) ken dagiti bideo iti panagbasa (reading videos).

Agpapaay met ni Celestra a Prinsipal ti Buenavista Elementary School iti Sorsogon. Kas ken ni Dr. Ballena, nangabak ni Celestra iti kategoria ti School Head Innovations babaen ti indauluanna nga E-NAY.COM (Education for Nanay in the Community) project.

Agpapaay met ni Sahara a mannursuro iti SLB Negeri Kota Banjarbaru iti Kalimantan Selatan, Indonesia. Nangabak met iti Teachers’ Innovation Category, ni Sahara ti nangparnuay ken nangipakat iti “Dara” applications para kadagiti ubbing nga adda rangkap ti panagdengngegda bayat ti pandemia a COVID-19.

Napili dagiti nangabak kalpasan ti naiget a tallo-nga-addang a panagpili ken panagrepaso.

Naipaay iti tunggal maysa kadagiti nangabak ti tropeo ti pammigbig ken travel grant nga agingga iti US$3,000 babaen ken ni Her Excellency, Minister Treenuch Thienthong, Minister of Education ti Thailand.

Naikkan met iti gundaway dagiti mannursuro a nangiparang kadagiti pinangabakda nga inobasion iti Knowledge Forum nga inorganisar ti Teachers Council of Thailand ken INNOTECH iti Bangkok idi Nobiembre 28 iti Centara Hotel Bangkok Phra Nakhon.