Lima a Daniw ni HONOR BLANCO CABIE
1
timmayok nga allawa* 'toy riknak
panagsiddaaw 'tay lumabas 'diay
kannaway 'ti sidiran ti balay:**
5 a Daniw
impuruaknak sadiay nagubingak.
no 'tay dumteng nepnep kadagidi
a panawen masansan a pangen
ladawanda innak maisipsipi:
mangted siddaawko 'ti panawen.
Agpa’bagatanda 'ti bigbigat
iti ngatuen rawis kaykayo 'diay
adda samekna a bakir 'diay sang-at,
daras idi innak mamurmuray.
‘di kannaway a bugbugtong innak
nasiluan nagutigot 'toy riknak.
*ullaw
**kannaway namindua nga immagibas,
nagampayag iti sidiran ti pagtaengak
itay napan a lawas.
2
ubbingkami napan nagbuya 'diay
kaabay kaminoreal ilimi:
sirkus buyaenmi nangmurmuray
kadakami ubbing pay la idi.
'diay entablado ta naka'd-adu
'tay agsasala 'diay sileng ken 'tay
is-isemda kas man la pudpudno,
ubbing, nataengan malinglingay.
tengnga ti pagbuyaan ta adda
napuskol a tabukol naisab-it
irutna 'ti pagpabuyaanda,
ballawasda ta addaan lap-it.
sirkero ken sirkera, ay! awan
natnag iti tabukol, ay! anian.
3
kabigatan panagbuybuyami
nga ub-ubbing 'ti sirkus abay 'diay
kalsada ta darasak nagkidday –
atanudko, saanen rabii.
impagarupko nga addaan lapsat,
mayat pay waingwaing patongna,
saan nga apo ni eva't mukodna –
matak darasen pannakasigkat.
atanudko, agbagbagkat metten
dua timba a danum, 'diay maselna
agkintayeg ni hermes* no isu
ti makakita 'diay tengngat' pangen.
naling-etannan pinta't rupana:
saanen a babai 'tanudko.
*iti mitolohia dagiti griego, isu ti
dios ken addaan naidumduma a
kinapigsa; dios pay ti angin.
4
pitot' tawen pay la ni 'tanudko
idi agtoktokar komedia 'diay
poblasion ilida, ay! pudpudno
laingna't trombone ta mangmurmuray.
tengnga 'diay entablado dagiti
prinsesa, prinsipe a moro, 'tay
kristiano ta mayat panagdir-i –
iskrimada ta makalinglingay.
piestat' pinili nakaad-adu
tattao a nakadalupisak
sanguanan entablado a bato –
matada pagbitinan ragragsak.
ngem ni atanudko lawlawenmi --
apalan ub-ubbing anak puli.
5
'daytoy espadak addaan tadem' –
daytat' naudi inda nangngegan
sakbay pinatit met ni kapitan
basilio* 'diay diding iti malem.
alla, kunam payen, atanudko,
agwinnasawas prinsipe a dua –
kristiano, moro – dagiti mata
din agrikep pati da musiko.
dependet' klase 'diay panagtimpag
ni apo kapitan, isu daydiay daytay
pangisadaganda ania itan
'tay matokar – anian salbag a biag.
adut' umili a mamurmuray
iti panagbibinnalubaldan.
*basilio fagaragan, dati nga
alcalde municipal iti ilida.
