Ni ABRAHAM C. AGUINO JR.
MANON a tawen a diyo nakitkita da Ma’am ken Sir?
Da Ma’am ken Sir a siaanus a nangisursuro kadakayo idi addakayo iti elementaria wenno iti hayskul. Nabayag la ketdin a diyo nakitkita ida, ta adda payen annakyo iti elementaria wenno iti hayskul. Wenno adda pay ketdi ngatan appokoyon. Ken titser wenno inheniero wenno abogadokayo pay ketdin. Wenno naballigi a mannalon.
Iti biang dagiti kameng ti Class 1987 ti St. Lawrence Academy ti Bangui, Ilocos Norte, innalada a gundaway ti pannakarambak ti maika-35 a tawen a panagturposda a nangsarungkar iti dadduma kadagiti nagbalin a mannursuroda iti hayskul.
Immuna a napanda sinarungkaran ni Mr. George Cawas (iti ladawan iti baba; nakatugaw ni Sir iti tengnga) a nagbalin a 4th Year adviser-da ken History teacher metten a nagtungpal iti panagsasangoda iti maysa a pangngaldaw iti Good Taste Restaurant iti Siudad ti Baguio itay Disiembre 3, 2022. Mangisursuro ngaminen ni Sir iti Baguio City National High School.
Rod Lofamia, dibuhista ti Bannawag, 79
Iti sumuno nga aldaw, Domingo, Disiembre 4, nakainniliwda met da Mrs. Julienne Marie Loman Dalanguey (maikadua manipud iti kanigid) ken Mrs. Fely Eustaquio Labasan (maikapat manipud iti kanigid) iti Max’s Restaurant, Session Rd. Dati a titserda ni Ms. Loman iti Filipino ken agob-obra itan iti maysa a kooperatiba. Ni met Ma’am Fely, a dati a titserda iti Math, mangisursuro itan iti St. Louis High School, maysa a Catholic school iti Itogon, Benguet.
Napalaus pay ti yaman ti grupo kada Mr. & Mrs.Dominador Abnasan a siaayat a nangpasangbay kadakuada iti pagtaenganda iti Irisan bayat ti kaaddada iti Baguio (ladawan iti baba).
Iti panagsublida iti Bangui, Ilocos Norte, dinagasda met a sinarungkaran ni Mrs. Jessalva Domo Aquino iti Bauang, La Union (kitaen ti akimbaba a ladawan; adda ni Ma’am iti maikatlo iti sango manipud iti kanawan). Dati pay a titserda iti Math ni Ma’am Salve, mangisursuro ita iti maysa nga eskuela elementaria iti ilina.
Maibilang iti grupo a napan nangsarungkar kada Sir ken Ma’am Atty. Margie Gines Laroya, Rubelyn Ortega Velasco, Evangeline Malapit Garvida, Carmelita Cabradilla Abnasan, Emily Reyes, Caroline Go, Carolyn Calipjo Garvida, Marites Garvida Agoy, ken ti autor. Kimmuyog pay ni Jeremy, anak ni Carolyn Calipjo Garvida.
Idanon met ti grupo ti panagyamanda kadagiti kaklaseanda a siaayat a timmulong a kas kada Rexy Tahilan, Margie Laroya, Vangie Garvida ken Carmi Abnasan, nangruna ken ni Carolyn Calipjo Garvida a kangrunaan nga isponsor ken nangidaulo iti pannakaurnos daytoy nga ibibisita. --O
