SIUDAD TI LAOAG. Duapulo ket innem a Persons Deprived of Liberty (PDL) iti Ilocos Norte Provincial Jail itoy a siudad ti benepisiario ti Hope in CorrectionALS a proyekto a pagtintinnulongan nga isaysayangkat ti Schools Division of Ilocos Norte nga idauluan ni Division Superintendent Dr. Joann A. Corpuz, CESO V, ken ti Ilocos Norte Provincial Jail nga idauluan ni Warden Benilda Sadian.

Ni Maricel T. Bagundol, Education Program Specialist II iti pannakisarsaritana kadagiti PDL iti kapilia ti Ilocos Norte Provincial Jail.

Aginnem a bulanen a maisaysayaat ti Alternative Learning System a para kadagiti PDL nga interesado a mangituloy iti panagadalda babaen dagiti learning sessions a maang-angay iti maminsan iti kada lawas iti uneg ti INPJ.

Manamnama nga agturposto dagitoy iti elementaria ken, dagiti dadduma, iti junior high school.

Malaksid kadagiti learning sessions, kinuna ni Markelvin E. Guzman, Education Program Specialist II, Alternative Learning System ti Schools Division of Ilocos Norte, a mayusuatto pay ti skills training kadagiti agad-adal a mausarda bayat ti panagyanda iti pagbaludan, nangnangruna inton addadan iti ruar ti pagbaludan.

Innayon ni Guzman a matulonganto met dagitoy a mangilako kadagiti inaramidda a produkto babaen ti pananglukatda iti ALStore. Maipablaak iti social media dagiti ladawan dagiti nadumaduma a partuatda a kas koma iti wallet, lampshade, key chain, dekorasion iti Paskua, ken dadduma pay.

(Naipablaak iti Disiembre 1-15, 2022 a bilang ti Bannawag.

Kadagiti kayatna ti ag-subscribe iti e-Edition, mapan iti Press Reader wenno Magzter.

Para iti naimaldit a kopia, kauman ni Boy Balanag iti CP Number 0916 269 2390

Para iti pakaseknan dagiti sinurat, ag-email iti [email protected].

Laglagipenyo koma, kakailian, nga i-follow ti Bannawag iti Instagram ken i-like ti Bannawag iti Facebook. Dios ti agngina.)