Agtultuloy ti balligi ti administrasion ni Mayor Rodrigo “Rambo” De Gracia, CESE ti Santa Teresita, Cagayan kas pammaneknek ti kaudian a pammadayaw a nagun-od daytoy, ti umuna a puesto iti nasional a lebel ti SubayBAYANI Award. Kadagupan ti 1,488 a munisipalidad iti sibubukel a pagilian, ti kaubingan nga ili iti Cagayan ti nangyalat iti umuna a puesto.
Iti seremonia ti pammadayaw a naangay itay Disiembre 12, 2022 iti Cocoon Boutique Hotel, Quezon City, pormal nga inawat ni Mayor De Gracia ti pammadayaw a kaipapanan ti naisangsangsayan a gapuanan nangruna iti pannakaidatag dagiti report mainaig kadagiti naileppas a proyekto ti ili. Maibatay iti plake ti pammigbig a pirmado ni DILG Secretary Atty. Benjamin C. Abalos, Jr., nabigbig ti Santa Teresita nga addaan iti “matino, mahusay at maaasahang serbisyo.”
Imbatad ni Mayor De Gracia nga amin a proyekto iti ili, makita a nalaing ti pannakayimplementarna ta ti tunggal sentimo nga ited ti gobierno, mapagnaaran ti amin nga umili. Kasta met nga insagutna ti nasao a pammadayaw kadagiti amin a Teresiano (umili iti Santa Teresita) a makitintinnulong iti pagsayaatan ti sibubukel nga ili.
Impanamnama ti ama ti ili ti panagtultuloy ti nadalus a panagserbi ti administrasionna babaen ti islogan a “Rang-ay, Regta ken Ragsak a Para Kadagiti Teresiano.” Agyaman met iti kunana a saan a magatadan a suporta da Ms. Liberata Agatep ti MLGOO ken da MPDC Engr. Mark Henry M. Mercado ken MEO Engr. Liezel S. Udaundo.
TURISMO: Intayon Idiay Ayuyang Garden iti Pila, Siudad ti Laoag!
Idi Abril 22, 2022, inyalat ti LGU Santa Teresita ti umuna a puesto iti rehional a lebel ti SubayBAYANI Award. (Edison Tobias)
