Kas paset ti agtultuloy a panagtitinnulong dagiti nadumaduma nga ahensia iti pannakayasideg dagiti serbisio, pannakaidanon ken pannakaiwaras dagiti impormasion ken teknolohia kadagiti umili iti probinsia, nagtinnulong manen ti Mariano Marcos State University (MMSU) babaen ti Extension Directorate ken ti Agricultural Training Institute, Regional Training Center 1 (ATI-RTC 1) a nakabase iti Tebag East, Sta. Barbara Pangasinan, iti pannakaiburay dagiti nadumaduma a pagbasaan iti Municipal Agriculture Office (MAO) iti nasao nga ili a nakaipasdekan met ti Farmers’ Information and Technology Services (FITS) Center. Ti FITS ti pakaalaan kadagiti nadumaduma a pagbasaan iti benneg ti agrikultura, pagbiagan, salun-at, ken dadduma pay. Maysa laeng daytoy kadagiti serbisio nga ipapaay ti FITS Center. Nairaman iti ladawan dagiti pannakabagi ti ATI iti panangidaulo ti Techno Gabay Program (TGP) Focal Person, Mr. Alladin Carbonel Tabo ti ATI-RTC 1, kaduana dagiti padana nga agserserbi iti ATI Information Services Section (ISS). Nairaman pay iti ladawan ni Ms. Karen Racuya manipud iti MAO-Burgos, agraman dagiti kakaduana nga agserserbi iti nasao nga opisina, ken dagiti taga-MMSU Extension Directorate a da Ms. Mercy Gano ken Dr. Sherlyn Nicolas. (Ladawan: ATI-RTC 1/Teksto: MRGano)/ Naipablaak iti Bannawag, Disiembre 16-31, 2022 a bilang.
