Ti Santa Teresita (Cagayan) Municipal Nutrition Council, agpakanawan: Cheryll Adorofeh P. Pancho, Mayor Rodrigo “Rambo” De Gracia, CESE, Dr. Cynthia Lyn T. Melchor, ken Joane V. Annang.
Ni LAYLANI TORIBIO

Naipaay iti Santa Teresita (Cagayan) ti Green Banner Award manipud iti Regional Nutrition Council bayat ti 2022 Regional Nutrition Awarding Ceremony a naangay itay Disiembre 2, 2022 iti Marco Paulo Hotel and Restobar,  Cauayan City, Isabela.

Indauluan ni Santa Teresita Mayor, Atty. Rodrigo P. De Gracia, CESE, ti Municipal Nutrition Council Team ti nasao nga ili a nangawat iti nasao a pammadayaw, kakaduana da Dr. Cynthia Lyn T. Melchor, Municipal Health Officer; Cheryll Adorafeh  P. Pancho, Nurse II ken Joan V. Annang, RM.

Maipapaay ti Green Banner Award kadagiti Gobierno Lokal ken Municipal Nutrition Council a nakagun-od iti di nabababa ngem 85 a porsiento, maibasar iti Monitoring and Evaluation of Local Level Plan Implementation, iti panangyimplementar ken panangipatungpal  kadagiti programa mainaig iti nutrision, panangsolbar iti malnutrision, panangiwanwan kadagiti nagannak iti nasayaat a panangisagana iti nasustansia a makmakan ken kasta met iti panangsupusop iti micronutrient deficiency kas iti Vitamin A ken Iron supplementation.

Daytoy ti maikadua a gundaway a nayalat ti LGU Santa Teresita (Cagayan) ti nasao a pammadayaw, pammaneknek nga iti maikadua a gundaway, nagun-od daytoy ti kangatuan a grado wenno rating iti tay-ak ti nutrision.

Malaksid iti Green Banner Award para iti LGU Santa Teresita, naipaay pay ken ni Dr. Cynthia Lyn Melchor ti maikadua a puesto iti 2021 Regional Outstanding Local Nutrition Officer.