Lima a Daniw ni HONOR BLANCO CABIE

1

kalgaw manen, ilokos, waigmo

a no nepnep ta addaan rungsot

sairenna manen 'toy mugingko,

Daniw

5 a Daniw

awan danummon a pumungpungtot.

mangngegko ti dung-aw daytoy riknak

saanen a daytay nangnangted 'tay

gumabbugabbo a panagamak

gapu't ay-ayusmo awan sarday.

ay! ngem ita 'tay batbatom innak

masirpat, kunkunak ay-ayka pay,

adda panagsidduker karkarmak,

koma adda kadakamit' tag-ay.

'ton agmatuon dagiti batom

sapulendantot' belnas 'tay danum.

2

no agkikitakam a maymaysa

‘tay ayugmi ta uray pay bibig

daytay awan ti ungapna

garakgakmi ‘tay mangpaspasikig.

no agtikrabkami maymaysa ‘diay

ablatna – ay! katawa man daytan,

katawa a makaited linglingay

ur-uray pay addakam pagnaan.

kastakami nga i-pinili* no

dumteng daytay panagkikitami,

daytay mauk-ukarkarmi adu,

kas man daytay nobela ti puli.

ay! ayugmi pay laeng ta daytan

garakgak kanigid ken kanawan.

*agnaed ken naipasngay iti maika-17

nga ili ti ilocos norte.

3

atanud, ta lumamlamiisen,

pul-oyna nga agpabagatan, ay!

nakakuadro't lagipko 'tay pangen

dagiti ubbing agtaraytaray.

mapanda makipaskua't balbalay

karrubada, daydiay matada ta

napno't rimat no adda maikaratay:

pamusian a manok a partienda.

dadduma sagsentabo 'tay inda

ipappapetpet no patupat 'tay

awan, adda bang-arda 'ti dana

no 'tay agawiddan 'diay balbalay.

kabigatanna ta mapandanto

manen a makipaskua 'tanudko.

4

ni rasputin adda taytayagna,

dakdakkel amang ngem kadagidiay

kaduana a lallaki't gimongda,

'diay kinatayagna mamagkidday.

no nakabitin 'tay makan isu,

awan sabalin, makagaw-at 'tay

makan, ar-araken naka'd-adu,

isuda a mayat a maitag-ay.

ay! ngem kunak naminsan, 'tanudko,

'diay kinatayag mangrugi iti

abaga ken tengnged -- daytat' pudno,

pinampandaganen daytat' puli.

manipud met idi dinengngegdan

ni 'tanudko maysa a kabassitan.

5

pul-oy nangar-arikap mugingko

ken balballawasko idi kalman

itag-aymo kadit' panunotko,

panagpaspasiarko't kakellengan.

anian, umadanika kad' kaniak,

warwarem 'ti laem kaunggak 'tay

nangitagtag-ay muging ken riknak,

nangted kaniak naruay a murmuray.

saanka nga umalumiim ta

mailiw met un-unay 'toy riknak,

barukongko't panangungngom ita,

pudno mailiw met 'toy karkarmak.

pul-oy palugodanka no gabbuem

riknak agpatpatnag, agmalmalem.