Ni RUDY B. CONTILLO
Nakaruar ti 20 a nagrepaso iti review class para iti Licensure Examinations for Agriculturists (LEA) nga inwayat ti LGU Santa, Ilocos Sur, kas impakaammo ni Mayor Jesus Bueno Jr.
Iti completion ceremonies dagiti nagrepaso, naawis ni Dr. Gus Molina Jr., international banana scientist ken dati a Vice Chancellor ti University of the Philippines Los Banos, a kas naisangayan a sangaili.
Naggapu dagiti baro nga agrikultor kadagiti nadumaduma nga ili ken probinsia. Iwaywayat ti LGU Santa ti tinawen a Review Class a pakaawisan dagiti agriculture experts manipud iti University of the Philippines Los Banos (UPLB) ken dadduma pay nga unibersidad a mangrepaso kadagiti ageksamen iti LEA tapno matulongan ida a makapagsagana nga agbalin a naan-anay a lisensiado nga agrikulturista.
Kinuna ni Mayor Bueno a libre ti tinawen a maiwaywayat a review classes. Dagiti taga-Santa, Ilocos Sur ikkan pay ida ti LGU Santa iti alawansda iti ipapanda panageksamen.
Awaten met ti LGU Santa dagiti aggapu iti nadumaduma nga ili ken adda pay dagiti aggapu iti sabali a probinsia.
Itoy a tawen, tallo ti nakaruar a taga-Santa, da Bryan Anthony Belen ti Nagpanaoan, Kim Oliver Cortez ti Rizal, ken Jansen Melaya ti Mabilbila Sur
Dagiti 17 a dadduma pay a nakaruar iti LEA: Robina Andallo ti Vigan City, Genesis Atayan ti San Juan, Argee Aurelio ti Sinait, Jack Lord Cammag ti Quirino, Audrae Nicka Clemente ti Sta Lucia, Charmaine Patricia Gabatino ti Candon, Angelo Langiden ti Candon, Aileen Matbagan ti Caoayan, Edmund Pajo ti Vigan City, Darren Ged Pascua ti Burgos, Maria Nella Ponce ti Narvacan, Jezel Mae Reyes ti Galimuyod, Ronalyn Romena ti Magsingal, Carla Rose Tica ti Vigan, Filmar Ugalde ti Candon, Joyzen Ugalde ti Salcedo, ken Ian Michael Ventura ti San Juan.
Inkari ni Mayor Bueno nga agtultuloy daytoy libre a maipaay a review class babaen ti LGU Santa.
