Pimmusay ni Pope Emeritus Benedict XVI iti tawenna a 95 itoy a Sabado, Disiembre 31, iti 9:34 iti bigat (4:34 iti malem iti Filipinas), iti pagtaenganna iti Ecclesiae Monastery ti Batikano, kas impakaammo ti Vatican News.

Impakaammo ti Holy See Press Office ti ipupusay ti Pope Emeritus iti pagtaenganna, a pinilina a pagyanan kalpasan ti panaglusulosna a Santo Papa idi 2013.

Sumagmamanon nga aldaw sakbayna, impakaammo ti Press Office ti kumarkaro a kasasaad ti salun-at ti Pope Emeritus gapu iti kinalakayna.

Impakaammo pay a mismo ni Pope Francis daytoy iti publiko  ken kiniddawna ti panangikarkararag koma dagiti tattao iti Pope Emeritus.

Naipasngay a kas Joseph Ratzinger iti Bavaria, maysa nga estado ti Germany, napili isuna a mangidaulo iti Iglesia Katolika idi 2005. Naglusulos idi 2013 gapu iti panagbaba ti salun-atna.