Lima a Daniw ni HONOR BLANCO CABIE
1
kaduak ni 'tanud 'di ubbingkami
iti lugar inkam dinakkelan,
anian panagdidinnugkalanmi:
Manipud Kadagiti Agdama a Kameng ti Bannawag: Dios ti Agngina!
adut' tarampo a magudguduan.
malaksid kinaawengna daydiay
tarampo a pagdugalko mayat
pay 'diay indurogna, panagkidday
agkakamakam, ay! awan pugsat.
ay! ngem ita awanen dagidi
agraw* a nangtapaya't karkarmak,
addan agrawedon** di kas idi –
addan panagaruyotna 'toy luak.
lagipko ta mangmangegna pay la
tarampok nga addaan indurogna.
*maaw-awagan no dadduma iti sambucus
javanica, manipud iti pamilia adoxaceae,
agtubtubo 'diay bhutan, laos, sabah,
indonesia, india, tsina ken dadduma a
naturod a lugar iti pinili, ilocos norte
iti pilipinas.
**namuli iti nagan ti kayo ken ti lugar
nga itudtudo ti biblia 'diay esdraelon (haifa
ita) iti israel a paglabananto iti maudi a
gundaway ti nasayaat ken nagulib.
2
punasenyon 'tay addaan pait
a lua, pinagaruyot dagiti
kinalkallabay dangkes a puli,
nagipangta kas 'tay sinit sal-it.
nagunawen panangirurumen,
pati panangikatkatawada
kada amma napnuan ti sirmata,
ti parmata't wasnay ti panawen.
agdepdeppesen pagay nairaep
kadagiti lunglungog abay 'diay
bantay, panagaanin, ay! anian:
leppas taltag datay' 'tay agtaep.
mano nga uyontot' maipan burnay,
narakrakem sadiay kakellengan.
3
tunggal letra 'ti alpabeto da
agsidsida't pinakbet ken mulio
addan pagtamdan a naisab-itda,
isudat' tangtangaden 'tay adu.
isudat' mangitagtag-ay puli
ni i-pinili -- siak, sika, isu
ken datayo -- iti rabrabii,
iti aldaw, bitbitendatayo.
iti kelleng inna a nangrugian,
iti siled op-opisina ta
garaw, pammati nabalitokan,
isu dayta daytay tinawidna.
naipaspasngat ar-aramidenna
daytay ayat, amakna't dios ama
4
'di sirmata ken parmata itan
adda agraraay a bungada,
isut' pagpampanakkel karkarma
ni i-pinili 'ti nagnagnaan.
napaluom uneg sangagasut
a kalgaw ken nepnep, palabras 'tay
napnuan ti sudina, mangitag-ay
rikna a nagsagaba't kudkuddot.
naggasat kaputotan nga ita
nagtawid nagaruyot a ling-et,
sangagasuten ti pinili, ay!
annak addan 'tay pagtangtangsitda.
'tay yamanda inda isaluket,
adda 'ti mugingda 'tay murmuray.
5
napankay 'ti pagin-inanaan,
adda't bulsitoyo 'tay laisda,
pulos di naksayan kabaelan
ngem impakitayo 'tay sirmata.
saanyo nga inregreg tunosyo,
panagkikinnallabayyo daytay
napasnek unay nga impakitayo:
nagilin tininongan ti bantay.
bumangonkay am-aminen intay
itan rambakan ti kasangayna
ti ili a nangted panagkidday,
maymaysa a puon panagrikna.
'tay yamantay isaguttay 'ti dios,
isu a nangsarapa't dos por dos.
