Lima a Daniw ni HONOR BLANCO CABIE
1
adda kadi 'tay sapsapulem 'ti
tangatang 'ti ngatuen ti pagyanak
'ti abay ti siudad, adda kadi?
Manipud Kadagiti Agdama a Kameng ti Bannawag: Dios ti Agngina!
kiddawko ibagam koma kaniak.
manen dayta panagsippayotmo
'ti sirok nawada a langit ta
kas man aritem pampanunotko,
kas man adda inka ibagbaga.
no agpa'miananka ngarud denggem
'toy bilinko: mapanka 'diay sang-at,
'diay surong ket balkotem 'tay anglem
lugar nangted kaniak panagrimat.
o taytayab, iti barukongko
daydiay anglem innak isapsapo.
2
no 'tay malpas ina ni 'tanudko
a mangilablaba’t pagan-anay
annakna nagbayengyeng,* wen, pudno,
mangigudagoden 'tay linglingay.
gaw-atennan 'tay biolinna idi
balasang pay, 'tay csárdás piesana
anian kulagtit ken panagdir-i,
makaited inana ti karkarma.
awan pulos kenkuana mangngegan
panagunget kadagiti annak,
simrek 'ti mugingko nga addaan
daytoy nga inat’ ubbog ti ragragsak.
ay! agpapan ita ni 'tanudko
bukodannat' innak panagkurno.
*iti dayta a panawen, uppat laengen kadagiti
annakna ti kabbalayna; 'diay inauna, addan
bukodna a pamilia, maikatlo ken maikapat
immunadan 'diay labes ti bantay; nabati laengen
ti maikadua, maikalima, maikanem ken
ti buridek.
3
dadduma ta masalsaludsodko:
ania ngata ti pasamakenda
isuda a mapanen 'ti dana
nga agturong bantay nga adayo?
adda natalna ngem adda met 'tay
kunam kas man a di maigaluten,
bagina 'tay kas man tumangtangken,
kas man kayatnan 'tay agtartaray.
adu met 'tay adda ulimekda,
awan panagwagteng, awan pulos
mangngeg nga asugda, awan daytay
mangngeg a panagrekreklamoda
kas man kapkaptenda ni apo dios
ta kadakuada ket awan patay.
4
nayaw-awanakton no bilang ta
daytoy lagip maregregko iti
dana't aldaw wenno 'ti rabii,
nayaw-awan metten 'toy karkarma.
awanton dagitay mohon innak
ulit-uliten a taliawen, 'tay
innakto pagtawingan murmuray,
innak pagsarukangan 'tay ragsak.
adda iti lagipko 'tay pigsak,
daytay mangted limpio 'toy mugingko
tapno diak maidardaramudom pay,
daytay mangiturong pappapanak.
daytoy lagip kidserko't lubongko,
isut' ubbog regta ken linglingay.
5
dadduma ta kamatkamatek 'diay
lagip iti tanap pagpagnaak
wenno 'ti baetan, bakrang bantay,
kadagiti bangkag ken tamtambak.
ammok kadagiti pinanidna
sadiay letra nga agaabay 'tay
manen mangbangon muging ken rikna,
sadiay manen makitak 'tay rayray.
'ti panaganges letra ta innak
manen masublian pampanunotko,
makitak 'diay ubing a karkarmak:
agang-angawkami 'ti lubongko.
no 'diay lagip daytay maipusko,
ay! agkarabuson 'toy mugingko.
