BANGUI, ILOCOS NORTE. Napabaro ti library ti Bangui National High School ket nabendisionan idi Disiembre 14. Makita iti ladawan dagiti nagatendar a kameng ti konseho ti San Lorenzo (nakaaruat iti t-shirt a nalabaga ken asul, agpakanawan iti tengnga a likud) a da Brgy. Sec. Sylvia Calivoso, Kgd. Rizalina Rayoan, Kgd. Nida Caluya, Federated SK Chairman Justine Philip Meneses, Kgd. Ireneo Ramos, Kgd. Ferdinand Espino, ken Kgd. Efren Malabed. Karagupda dagiti mannursuro ken empleado ti BNHS. Nagtengngaanda da Prinsipal Joel B. Manuel (nakapolo iti asul) ti nasao a pagadalan ken Pastor Jumar Fernandez (naka-long sleeves iti asul) a nangidaulo ti panakabendision ti library. Napabaro ti library babaen ti tulong ti Brgy. SK nga idauluan ni Chairman Justine Philip Meneses a nagidonar kadagiti kompiuter ken pagprintaan. Tumulongdanto pay iti pannakabayad ti koriente a mausar. Timmulong met ti Three Acts of Goodness Foundation ti Guang Ming College iti pannakatarimaan ti bobeda ti library. Iti sabali pay a ladawan, ginetteng da Kgd. Nida Caluya ken SK Chairman Justine Meneses ti laso nga inasistaran ni Prinsipal Joel B. Manuel ken dagiti dua a head teacher a da Gerardo Baltazar Jr. ken Heri Bert Pascua (agpada a nakapuraw iti likudan ti prinsipal) . (Rinetrato da Ian Mark Catacutan ken Jerome Corcoro/ Teksto: Abraham C. Aguino Jr.) / Naipablaak iti Bannawag, Pebrero 1-15, 2023 a bilang.
