Ni ROSELYN C. CAMPANO
DEKALIDAD nga estudiante ti bunga ti dekalidad a mannursuro.
Daytoy ti paset ti mensahe ni Mayor Marilyn S. Pentecostes nga imbagian ni Vice Mayor Jessie G. Gaspar iti umuna nga aldaw ti In-Service Training (INSET) dagiti amin a mannursuro ti Gonzaga iti Gonzaga People’s Gymnasium itay Pebrero 6, 2023. Aggibus ti panagsanay inton Biernes, Pebrero 10.
Kasano ti kinapudno daytoy?
Pudno a gapu iti pandemia, immadu dagiti “learning gaps” wenno problema iti panagsursuro dagiti ubbing. Dagitoy a problema ti masapul a solbaren dagiti mannursuro ta nayarig daytoy iti pigis ti bado a masapul a takupan tapno saan a mapakaruan a madadael agingga a saanen a mausar. No kastoy ti aramiden, agpada a magunggonaan ti estudiante ken ti mannursuro ta nagtinnulongda a nanglayaw iti dakkel a giwang a napataud gapu kadagiti saan a dagus a nasolbar a problema iti edukasion. Iti kastoy a pamay-an, sigurado a makapataud ti mannursuro iti nalaing nga ubing a nakasursuro kadagiti kasapulanna a kompitensi.
TURISMO: Intayon Idiay Ayuyang Garden iti Pila, Siudad ti Laoag!
Ngem kasano a maaramid daytoy dagiti mannursuro?
Babaen ti INSET. Maysa daytoy kadagiti programa ti Department of Education tapno manayonan pay ti pannakaammo dagiti mannursuro maipapan kadagiti kabaruan a pamay-an ti panangisuro wenno kabaruan a programa a maisayangkat tapno agbalin a nasamsamay nga ahente ti panagbalbaliw─ manipud iti maysa nga ubing a bassit laeng ti ammona agingga a dumakkel a maikkan iti kalasag ti pannakaammo tapno natured a sumango iti dangadang iti daytoy a lubong.
Kinapudnona, maysa daytoy kadagiti “4 critical components” nga impresentar ni Vice President ken Deped Secretary Sara Z. Duterte─ ti maikapat iti MATATAG Agenda nga isu ti panangipaay iti suporta kadagiti mannursuro tapno sumayaat pay ti panangisuroda. Tapno maaramid daytoy, napateg a marukod ken makita dagiti “development needs” wenno dagiti kasapulan a pasayaaten pay dagiti mannursuro ket daytoy ti pangrugian ti DepEd a mangkita kadagiti “intervention” wenno solusion, babaen man dayta iti programa wenno panagsanay, tapno mapuntaan ti umiso a target─ a dayta ket ti pannakasanay dagiti mannursuro kadagiti pagkapuyanda. Iti kastoy a pamay-an, maaddaanda iti umisu ken naintiempuan nga armas a manglaban kadagiti karit iti sektor ti edukasion. Mainayon ditoy ti pannakaipaayda kadagiti napapateg a kasapulan dagiti ubbing. Kangrunaan iti amin, maaddaanda iti panagtalekda iti bukodda a bagi nga agisuro agsipud ta nasanayda.
Dagiti mannursuro, kasapulanda latta ti agsursuro. Ket agtultuloy dayta a panagsursuro. Isu a no adda INSET, go na go dagiti mannursuro ta dagitoy ti arigna ganagan nga usarenda tapno makaibungada kadagiti dekalidad nga estudiante nga agbalin a namnama ti pagilian. --O
