Agawaten ti GUMIL Filipinas iti aplikasion para iti Pasnaan 12, ti maika-12 a batch ti workshop iti panagsurat a para kadagiti mannurat iti Ilokano. Manamnama a maangay daytoy iti Apayao inton Hulio.

Pagtitinnulongan daytoy nga iwayat ti GUMIL Filipinas, Bannawag, ken dadduma pay nga ahensia ken indibidual.

Dagiti maawat a fellow:

4 a senior fellow – Pilien ken imbitaran ti Workshop Director

5 a fellow – Piksion (flash fiction)

5 a fellow – Sarita a Para Ubbing

Masapul a mangidatag ti tunggal aplikante babaen ti email iti grupo dagiti sinurat (portfolio), ania man kadagiti sumaganad:

*Dua a flash fiction (max. 800 a balikas);

*Dua a sarita a para ubbing (target nga agbasa: Grade 1 to 3) (max. 700 balikas).

Masapul a naisurat iti Ilokano dagiti nadakamat a sinurat ken addaan iti title page a nakailanadan ti nagan iti pluma (pen name) ken linaonna (table of contents). Masapul a naka-Word Format ti portfolio. Usaren ti 12 points Times New Roman, doble espasio iti Letter size ken Normal margins.

Pakuyogan dagiti manuskrito iti sabali a Word file a naglaon iti pudno a nagan ti autor, adres, pakakontakan a numero, email address, ababa a pakasaritaan ti biag (bionote) ken kabaruan nga ID picture, ken may-email iti [email protected]; usaren ti paulo (subject) a “Pasnaan 12.”

Agdalan dagiti sinurat iti panagarisit dagiti kameng ti Selection Board ti Committe on Seminar-Workshop ti GUMIL Filipinas. Mapakaammuanto dagiti autor dagiti mapili a gapuanan babaen ti email ken/wenno awag iti selpon.

Maipaayan iti sangkabassit nga honorarium dagiti mapili a fellow.

Aggibus ti panagidatag iti aplikasion iti alas 11:59 ti rabii iti Marso 31, 2023.

Para iti ad-adu pay nga impormasion, umawag wenno ag-text iti 0977 141 7901 (NME Valdez) wenno ag-email iti [email protected]. (Pasnaan 12 Secretariat). --O